Weird News : अनेकदा तुम्ही पाहिलं असेल की, एखाद्याची गंमत करणं काही लोकांना चांगलंच महागात पडतं. कधी कधी गंमत अशी अंगावर येते की, तुरूंगातही जावं लागू शकतं किंवा मोठं नुकसानही होऊ शकतं. असंच काहीसं एका महिलेसोबत झालं. दक्षिण कोरियातील महिलेला पुरूष सहकाऱ्यासोबत प्रॅंक करणं चांगलंच अंगलट आलं.
झालं असं की, महिलेनं सगळ्यांसमोर पुरूष सहकाऱ्याची पॅंट खेचली. यावेळी चुकून त्याची अंडरविअर सुद्धा खेचली गेली होती. त्यानंतर हे प्रकरण कोर्टात गेलं आणि महिलेला २ हजार डॉलर म्हणजेच १ लाख ७० हजार रूपयांचा दंड भरावा लागला.
साऊथ कोरियाच्या गॅंगवॉन प्रांतातील एका कोर्टानं महिलेला दोषी ठरवत निर्णय दिला. एका रिपोर्टनुसार, चुन्चेओन जिल्हा न्यायालयानं काही दिवसांआधी महिलेला २ हजार डॉलरच्या दंडासोबतच ८ तास विनयभंग रोखण्यासाठीचं शिक्षण घेण्याचा आदेशही दिला.
ही घटना ३ ऑक्टोबर २०२४ मध्ये घडली होती. महिलेनं सगळ्या सहकाऱ्यांसमोर एका पुरूष सहकाऱ्याची पॅंट खेचली होती. ही घटना ते दोघेही काम करत असलेल्या रेस्टॉरन्टमध्ये घडली होती. सहकाऱ्याची पॅंट खेचत असताना चुकून त्याची अंडरविअरही खेचली गेली. त्यामुळे वाद जास्त झाला. महिलेचं वय ५० वर्ष तर पुरूषाचं वय २० वर्षे आहे.
महिलेनं कोर्टात तिनं गंमत केल्याचं म्हटलं होतं. पण कोर्टानं तिचा दावा फेटाळून लावला. तेच तक्रारदारानं आरोप केला की, महिलेच्या गंमतीमुळे त्याचा अपमान झाला. तरूणाची बाजू घेत कोर्टानं महिलेला दंड ठोठावला. तसेच महिलेने तरूण आणि त्याच्या आई-वडिलांची गुडघ्यांवर बसून माफी मागितली होती.