अलिकडे लग्नाच्या आठवणी जतन करुन ठेवण्यासाठी अनेक नवीन जोडपी वेडिंग फोटोशूट करु लागले आहेत. यासाठी मोठा खर्च करुन मोठमोठी तयारी केली जाते. असंच काहीसं ऑस्ट्रेलियातील ग्लेन मॅकी आणि एमी मॅकी यांनी केलं. लग्नाचा दिवस होता. वेडिंग शूटची खास तयारीही करण्यात आली होती. प्रोफेशनल फोटोग्राफर बोलण्यात आले होते. एकानंतर एक सुंदर फोटो घेतले जात होते. पण अशातच असं काही घडलं की, दोघांनाही जीव मुठीत घेऊन तेथून पळ काढावा लागला.
ही घटना साऊथ वेल्सची आहे. ग्लेन आणि अॅमी लग्न बंधंनात अडकणार होते. एका डोंगरावर फोटोशूट सुरु होतं. यासाठी खास एका घोड्याचीही व्यवस्था करण्यात आली होती. सगळंकाही फार सुंदर दिसत होतं. पण तेव्हाच एक वळू तिथे आला. तो चांगलाच संतापलेला होता. नवरी-नवरदेव आणि फोटोग्राफर यांच्या काही लक्षात येण्याआधीच तो वळू त्यांच्यामागे धावू लागला. मग काय! सगळेजण आपला जीव मुठीत घेऊन सैरावैरा पळू लागले.
घोड्याच्या ट्रेनरने 'डेली मेल'ला सांगितले की, 'आम्ही डोंगरावरुन खाली येत होतो आणि तेव्हाच वळू आमच्या दिशेने धावत येत होता. अॅमी वेडिंग गाऊन सांभाळत पळू लागली होती. वळू फार जवळ आला होता. हा फारच भीतीदायक अनुभव होता. पण नंतर आम्ही सर्वांना या झालेल्या प्रकारामुळे हसू कोसळलं'.
अॅमी आणि ग्लेन यांच्या लग्नाला या वळूने चांगलंच यादगार ठरवलं. आश्चर्याची बाब म्हणजे तिथे थोड्या अंतरावर लग्नाला आलेले पाहुणे मद्यसेवन करत होते. ते त्यात इतके मग्न होते की, त्यांना या घटनेबाबत काहीच माहीत नव्हतं. पण नंतर त्यांना हे कळाल्यावर त्यांनाही हसू आवरलं नाही.
ग्लेन सांगतो की, 'जेव्हा वळू आमच्या मागे लागला तेव्हाचा फोटो घेऊन फोटोग्राफरने आमचं लग्नही नेहमीसाठी स्मरणात राहिल. आम्ही हे मजेदार फोटो आमच्या घरात लावू. मला नाही वाटत की, कुणालाही त्यांच्या लग्नात अशाप्रकारच्या फोटोग्राफीची संधी मिळाली असेल'.