प्रेयसीला मारहाण आणि आईला धमकी देण्याचा आरोप असलेल्या एका व्यक्तीनं भलताच कारनामा केला आहे. पोलीस अटकेसाठी पोहोचताच ही व्यक्ती थेट झाडावर चढली. पोलिसांनी आर्जवं विनंत्या करूनही त्यानं झाडावरून खाली उतरण्यास नकार दिला.
'द सन युके'नं दिलेल्या वृत्तानुसार, आरोपी २४ तासांहून अधिक वेळ झाडावरच होता. या दरम्यान खाली असलेले पोलीस त्याला आवाहन करत होते. मात्र आरोपी खाली उतरण्यास तयार नव्हता. अमेरिकेतील न्यूयॉर्कमध्ये हा अजब प्रकार घडला आहे. आईला धमकी दिल्याप्रकरणी पोलीस संबंधिताला अटक करण्यासाठी त्याच्या घरी गेले होते. ५० वर्षीय प्रेयसीला आठवड्याभरापूर्वी मारहाण केल्याची तक्रारदेखील पोलिसांना त्याच्या विरोधात मिळाली होती.
पोलिसांनी अटक करण्यापूर्वी आरोपी त्याच्या घराच्या छतावर चढला. त्यानंतर तो बाजूलाच असलेल्या ३० फूट उंच झाडावर चढला. पोलीस बुधवारी त्याला पकडण्यासाठी पोहोचले. मात्र त्यानं संपूर्ण रात्र झाडावर काढली. पोलिसांनी त्याला खाली उतरवण्यासाठी विविध प्रयत्न केले. मात्र त्यांच्या हाती अपयश आलं.
पोलीस आरोपीविरोधात कठोर कारवाई करण्याच्या तयारीत होते अशी माहिती शेजाऱ्यांनी दिली. आरोपी हिंसक नव्हता. मात्र तरीही पोलीस कठोर कारवाई करणार होते. पोलिसांवर विश्वास नसल्यानं आरोपी खाली उतरण्यास तयार नव्हता. आरोपीला एकदा दोन वर्षांचा तुरुंगवास घडला. मात्र त्या कालावधीत त्याच्यासोबत पोलिसांनी गैरवर्तन केलं होतं, असं शेजाऱ्यांनी सांगितलं.