Jaljira Packet from 1997: सोशल मीडियावर दररोज हजारो व्हिडीओ व्हायरल होतात, पण त्यापैकी काहीच व्हिडीओ असे असतात, जे लगेचच लोकांचं लक्ष वेधून घेतात. असाच एक व्हिडीओ सध्या इंटरनेटवर धुमाकूळ घालत आहे. या व्हिडीओमध्ये एका व्यक्तीला पाईपलाईनच्या दुरुस्ती दरम्यान २८ वर्षांपूर्वीचं 'जलजीरा'चं पाऊच सापडलं आहे, ज्यामुळे नेटकऱ्यांमध्ये आश्चर्य आणि चिंतेची लाट पसरली आहे.
व्हिडीओमध्ये दिसतं की, एक व्यक्ती जमिनीमध्ये खोदकाम करत आहे आणि त्याच दरम्यान त्याच्या हातात एक जुनं 'जलजीरा'चं पाऊच लागतं. जवळून पाहिल्यावर कळतं की, हे पाऊच १९९७ सालचं आहे. आश्चर्यकारक गोष्ट म्हणजे, इतकी वर्षं जमिनीमध्ये असूनही या प्लास्टिक पाऊचला काहीही झालेलं नाही. व्हिडीओमध्ये हा व्यक्ती म्हणतो की, "इतक्या वर्षांत या प्लास्टिकचं काहीही बिघडलेलं नाही, आजही हे पाऊच जसं होतं तसंच आहे. म्हणूनच, प्लास्टिकचा वापर करू नका, प्लास्टिकला आजच 'नाही' म्हणा."
प्लास्टिकच्या धोक्याची जाणीवहा व्हिडीओ व्हायरल झाल्यानंतर नेटकऱ्यांनी यावर तीव्र प्रतिक्रिया दिल्या आहेत. अनेक युजर्सनी प्लास्टिकमुळे होणाऱ्या गंभीर परिणामांबद्दल चिंता व्यक्त केली आहे. एका युजरने लिहिलं, "अनेक वर्षांपासून म्हटलं जात आहे की, प्लास्टिक कचरा लोकांसाठी एक मोठी समस्या बनत आहे. प्लास्टिक प्रदूषण आपल्या शरीरासाठी आणि खाद्यपदार्थांसाठी सर्वात धोकादायक आहे. हे पिकांनाही नुकसान पोहोचवत आहे. अजूनही वेळ आहे, मित्रांनो, जागे व्हा." दुसऱ्या एकाने 'प्लास्टिक हटाओ, देश बचाओ' अशी घोषणा दिली आहे.
काही युजर्सनी या व्हिडीओला 'डोळे उघडणारा' (eye-opening) असं म्हटलं आहे, तर काहींनी मजेशीर प्रतिक्रियाही दिल्या आहेत. एका युजरने गंमतीने लिहिलं की, "अर्ध्या इंस्टाग्राम युजर्सपेक्षा हे प्लास्टिक पाऊच जास्त जुनं आहे." तर दुसऱ्याने, "ही एक अशी जीवाश्म (fossil) आहे, ज्यावर तिची तारीखही लिहिलेली आहे," असं म्हटलं. काही युजर्सचं लक्ष पाऊचवर छापलेल्या १.२५ रुपये या किमतीकडे गेलं. त्यांच्या मते, त्या काळात ही किंमत खूप जास्त होती.
हा व्हिडीओ प्लास्टिक प्रदूषणाचा गंभीर धोका पुन्हा एकदा अधोरेखित करतो. प्लास्टिक हजारो वर्षं नष्ट होत नाही, हे या २८ वर्षांपूर्वीच्या पाऊचने सिद्ध केलं आहे.