अनेक वेळा लोक आपला व्यवसाय योग्य असल्याचं सिद्ध करण्यासाठी कोणत्याही थराला जातात. यासाठी ते काहीही करायलाही मागेपुढे पाहत नाहीत. अशीच एक अजब घटना आता समोर आली आहे. एका चिनी कंपनीच्या चेअरमननेही असंच काहीस केलं आहे ज्यामुळे तो जोरदार चर्चेत आला आणि त्याचा व्हिडीओ सोशल मीडियावर खूप व्हायरल झाला.
कर्मचार्यांच्या बैठकीदरम्यान, क्लींजिंग प्रोडक्ट मॅन्युफॅक्चरर होंगवेईच्या चेअरमनने कपडे धुण्याच्या साबणाबाबत एक प्रेजेंटेशन दिलं. ज्यामध्ये त्याने साबणात कोणतंही हानिकारक केमिकल नसल्याचं सांगितलं. यामध्ये फक्त एलकली, एनिमल फॅट आणि दूध आहे असं म्हटलं. त्यानंतर आपलं प्रोडक्ट हे नॅचरल आहे हे सिद्ध करण्यासाठी त्याने एखाद्या बिस्किटाप्रमाणे तो साबण खाण्यास सुरुवात केली.
व्हिडिओमध्ये चेअरमन म्हणाला की, हा साबण इतका नॅचरल आहे की तो पोटात गेल्यास बॉडी फॅट आणि ऑईलमध्ये बदलतो. पण पुढे त्याने लोकांना हा साबण न खाण्याचा देखील सल्ला दिला आहे. साबण नॅचरल आहे हे सिद्ध करण्याच्या प्रयत्नात कंपनीच्या चेअरमनने हे सर्व केलं आहे. पण हा व्हिडीओ जोरदार व्हायरल झाल्यानंतर लोक इंटरनेटवर या व्यक्तीची खूप खिल्ली उडवत आहेत. एका हिंदी वेबसाईटने याबाबतचे वृत्त दिले आहे.