सापाचं नाव ऐकताच अनेकांचा थरकाप उडतो. पण काही लोक विषारी सापांसोबत नको नको ते कारनामे करतात. तुम्ही पाहिलं असेलच की, अनेक लोक साप गळ्यात घालून फिरतात. असाच प्रकार एक तरूण करत होता. त्याचा व्हिडीओही रेकॉर्ड केला जात होता. ठाणे जिल्ह्यातील ही घटना असून त्याने गळ्यात साप गुंडाळला होता आणि त्याच्यासोबत खेळत होता. तेव्हाच सापाने त्याला दंश मारला आणि त्याचा मृत्यू झाला.
इंडिया टाइम्सनुसार, एका पोलीस अधिकाऱ्याने सांगितलं की या २८ वर्षीय व्यक्तीचं नाव मोहम्मद शेख होतं. त्याने संजय नगर भागात साप पकडला आणि त्याला गळ्यात गुंडाळला. त्यानंतर तो बाजारात सापाला घेऊन फिरत होता. जेव्हा तो सापासोबत खेळत होता तेव्हा सापाने त्याला तीनदा दंश मारला. (हे पण वाचा : बाप रे बाप! महिलेने हाताने पकडला इतका मोठा साप की व्हिडीओ पाहून उडेल थरकाप.....)
जेव्हा ही घटना घडली तेव्हा मोहम्मदचे मित्र त्याचा सापासोबत खेळतानाचा व्हिडीओ शूट करत होते. त्याला सापाने दंश मारल्यावरही ते त्याचा व्हिडीओ काढत राहिले. त्यांना मोहम्मदला हे धोकादायक काम करण्यापासून रोखलं नाही. हा व्हिडीओ सोशल मीडियावर व्हायरल झाला आहे.
सापाने दंश मारल्यावर काही वेळातच मोहम्मदला अस्वस्थता जाणवू लागली होती. त्यानंतर त्याला लगेच हॉस्पिटलमध्ये दाखल करण्यात आलं. तिथे त्याला डॉक्टरांनी मृत घोषित केलं. अधिकाऱ्यांनी सांगितलं की, पोलिसांना दुर्घटनेत तरूणाचा मृत्यू झाला अशी नोंद केली आहे.