काही मिनिटांत फास्ट फूड तयार करण्याचा दावा एका कंपनीला चांगलाच महागात पडला आहे. फास्ट फूड कंपन्या बर्याचदा दावा करतात की, त्यांचे फूड मर्यादित वेळेत तयार केले जाऊ शकते आणि लोक या दाव्यावर खरेदी करतात, परंतु जेव्हा असे होत नाही, तेव्हा ग्राहक खूप नाराज होतात. मार्केटिंगची ही टेक्निक ग्राहकांना भुरळ घालण्यासाठी कदाचित ठीक आहे, परंतु जेव्हा हे शक्य नसते तेव्हा नकारात्मक परिणाम होऊ शकतो. दरम्यान, एका महिलेला या दाव्याचा इतका राग आला की, तिने याविरोधात टोकाचे पाऊल उचलण्याचा निर्णय घेतला.
आपला पास्ता (PASTA) अवघ्या साडेतीन मिनिटांत तयार झाला नसल्याचा दावा करत महिलेने पास्ता कंपनीला कोर्टात आव्हान दिले. अमेरिकेतील फ्लोरिडा येथील एका महिलेने अमेरिकन फूड कंपनी क्राफ्ट हेन्झच्या (Kraft Heinz) विरोधात 5 मिलियन डॉलरचा दावा दाखल केला आहे, ज्याची किंमत भारतीय चलनात 40 कोटी रुपयांपेक्षा जास्त आहे. अवघ्या साडेतीन मिनिटांत पास्ता तयार होईल, असा दावा कंपनीने केला होता. मात्र, तसे न झाल्याने ती महिला प्रचंड संतापली.
अमेंडा रेमिरेज (Amanda Ramirez) असे या महिलेचे नाव आहे. या महिन्यात 18 नोव्हेंबर रोजी दाखल केलेल्या वर्ग कृती खटल्यात अमेंडा रेमिरेज यांनी आरोप केला आहे की, क्राफ्ट हेन्झ कंपनीने (KHC) वेल्वेटा मायक्रोवेव्हेबल मॅक अँड चीज कप तयार करण्यासाठी 3.5 मिनिटे लागतात असे सांगितले. पण झाले नाही. पॅक केलेल्या बॉक्सवर स्पष्टपणे लिहिले आहे की वेल्वेटा शेल्स अँड चीज 3.5 मिनिटांत तयार होतो. मायक्रोवेव्हमध्ये मॅकरोनी पास्ता शिजवण्यासाठी लागणारा वेळ साडेतीन मिनिटांपेक्षा जास्त आहे.
डब्लूएफएलएच्या रिपोर्टनुसार, फ्लोरिडाच्या दक्षिणी जिल्ह्यासाठी यूएस जिल्हा न्यायालयात दाखल केलेल्या खटल्यात असे म्हटले आहे की, प्रक्रियेमध्ये गुंतलेल्या इतर टप्प्यांमुळे पास्ता तयार होण्यास जास्त वेळ लागतो. महिलेने ऑक्टोबर ते नोव्हेंबर 2022 दरम्यान मॅक अँड चीज कप 10.99 डॉलरमध्ये खरेदी केले, परंतु पास्ता तयार करण्यासाठी महिलेला किती वेळ लागला हे सांगितले नाही.
ज्या महिलेने कंपनीविरोधात गुन्हा दाखल केला आहे. तिने 50 लाख डॉलर म्हणजेच 40 कोटी 80 लाख रुपयांची नुकसानभरपाईची मागणी केली आहे. क्राफ्ट हेन्झ कंपनीने या प्रकरणाबाबत मीडियाला सांगितले की, हे जबरदस्तीचे प्रकरण आहे. "आम्हाला या बिनकामाच्या खटल्याची माहिती आहे आणि आम्ही तक्रारीतील आरोपांचा जोरदारपणे बचाव करू", असे अमेरिकन क्राफ्ट हेन्झ कंपनीने सांगितले आहे.