लग्न समारंभात भन्नाट किस्से हे घडत असतात. हल्ली मित्र- मैत्रिणी नवरी आणि नवरदेवाला हटके गिफ्ट देतात. काही जण रिकामा बॉक्स तर काही रोजच्या वापरातल्या साबण, झाडू अशा गोष्टी लग्नात देतात. यामुळे गंमत येते. मात्र तुम्हाला जण कोणी लग्नामध्ये गाढव गिफ्ट म्हणून दिल्याचं सांगितलं तर खोटं वाटेल किंवा विश्वासच बसणार नाही. पण हो हे खरं आहे. अशीच एक अजब घटना पाकिस्तानमध्ये घडली आहे. एका नवरदेवाने आपल्या बायकोला चक्क गाढव गिफ्ट म्हणून दिला आहे.
गाढव गिफ्ट दिल्याने पाकिस्तानच्या यूट्यूबरची जोरदार चर्चा रंगली आहे. त्याने हा व्हिडीओ आपल्या इन्स्टाग्राम अकाऊंटवरून शेअर केला आहे. अजलन शाह या प्राणीप्रेमीने आपल्या इन्स्टाग्राम पोस्टवर ही घटना शेअर केली आहे. यामध्ये त्याने आपल्या पत्नीला गाढवाचे पिल्लू भेट दिल्याचे सांगितले. वारिशा असं त्याच्या पत्नीचं नाव आहे. तुला गाढव खूप आवडतं आणि दुसरं असं की हा जगातील सर्वात गोंडस आणि मेहनती प्राणी आहे असंही अजलनने पत्नीला म्हटलं आहे.
अजलान शाह हा पाकिस्तानच्या प्रसिद्ध यूट्यूबर आहे. त्याचे अनेक व्हिडीओ हे जोरदार व्हायरल होत असतात. त्याने काही दिवसांपूर्वी वारिशा हिच्याशी निकाह केला. त्यानंतर वेडिंग रिसेप्शनमध्ये वारिशाच्या आवडीचं गिफ्ट म्हणजे गाढव दिला आहे. अजलानने दिलेल्या माहितीनुसार, मला माहिती आहे की वारिशाला गाढव खूप जास्त आवडतं. म्हणूनच मी तिला लग्नाच्या निमित्ताने हे गिफ्ट दिलं आहे.
अजलान शाह व्हिडिओमध्ये म्हणतो की, "आम्ही गाढवाच्या पिल्लाला त्याच्या आईपासून वेगळे केलेले नाही. तीही त्याच्यासोबत आली आहे. या दोघांना 30 हजार रुपयांना विकत घेतले होते. आता त्यांना कोणतीही मजुरी करावी लागणार नाही. ते दोघे आमच्या फार्मवर आनंदाने जगतील. माझ्या प्रमाणेच वारिशा देखील प्राणीप्रेमी आहे. म्हणूनच मी तिला हे गिफ्ट दिलं. लोक काय म्हणतील याचा मला फरक पडत नाही." एका हिंदी वेबसाईटने याबाबतचे वृत्त दिले आहे.
सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"