मुलीच्या लग्नाची तयारी सुरू असताना वडिलच बोहल्यावर चढल्याचा अजब प्रकार घडला आहे. लेकीच्या विवाहाची तयारी सुरू असताना वडिलांचं प्रेम प्रकरण समोर आलं. त्यामुळे एकच खळबळ उडाली. त्यानंतर गावासमोर वडिलांनी प्रेयसीसोबत विवाह केला. झारखंडच्या गढवा जिल्ह्यामध्ये हा प्रकार घडला.
मुलीच्या लग्नासाठी उभारण्यात आलेल्या मंडपामध्ये वडिलांचा विवाह संपन्न झाला. विशेष म्हणजे या व्यक्तीचे आधी दोन विवाह झाले आहेत. त्याला चार मुलंदेखील आहेत. गढवा जिल्ह्यातील लवाही कला गावात ही घटना घडली.
५६ वर्षांच्या शिव प्रसाद वैद्य यांचं त्यांच्याच विद्यार्थिनीवर प्रेम जडलं. शिव प्रसाद गावातील एका विद्यार्थिनीची शिकवणी घ्यायचे. त्यादरम्यान दोघांमध्ये प्रेमसंबंध निर्माण झाले. तीन वर्षांपूर्वी तरुणी घरातून एकाएकी बेपत्ता झाली. त्यानंतर तिच्या वडिलांनी पोलीस ठाण्यात तक्रार नोंदवली आणि शिव प्रसाद यांच्यावर संशय व्यक्त केला. मात्र पोलिसांनी कोणतीही कारवाई केली नाही.
तीन वर्षांपासून मुलीचा ठावठिकाणा लागत नव्हता. बेपत्ता तरुणी छत्तीसगडच्या एका गावात असल्याची माहिती तिच्या कुटुंबीयांना गेल्या सोमवारी मिळाली. शिव प्रसादनं तरुणीला एका भाड्याच्या खोलीत ठेवलं होतं. तरुणीच्या कुटुंबीयांनी याची माहिती ग्रामस्थ आणि पोलिसांना दिली. त्यानंतर पोलिसांनी शिवप प्रसाद वैद्यला चौकशीसाठी बोलावलं. त्यानं सत्य कबूल केलं.
तरुणी एका मुलाची आई झाल्याचं शिव प्रसादनं सांगितलं. त्यानंतर तरुणीला छत्तीसगडला आणण्यात आलं. मंगळवारी वरात काढण्यात आली. बाबा मगरदह महादेव मंदिरात दोघांचं लग्न लावून देण्यात आलं. यावेळी पोलिसांसह ग्रामस्थ मोठ्या संख्येनं उपस्थित होते.