Fight over Underwear: शेजार्यांमध्ये अनेकदा भांडण झाल्याचे तुम्ही ऐकले असेल. कधीकधी हे भांडण अतिशय शुल्लक कारणावरुन होते. असाच काहीसा प्रकार उत्तर प्रदेशातील आझमगडमध्ये घडला आहे. शेजाऱ्यांमध्ये अंडरवियरवरुन भांडण झाले. भांडण इतके वाढले की, दोन गटांत तुंबळ हाणामारीदेखील झाली. या घटनेत 8 जण जखमी झाले असून या सर्वांना रुग्णालयात दाखल करावे लागले.
मीडिया रिपोर्ट्सनुसार ही घटना उत्तर प्रदेशातील आझमगढ जिल्ह्यातील आहे. येथील कटरा भागात ही घटना घडली. हा वाद अंडरविअर सुकवण्यावरुन सुरू झाला. सुरेंद्र आणि गुड्डू अशी या दोन्ही शेजाऱ्यांची नावे असून दोघांमध्ये जुना वादही होता. यावेळी अंडरविअरवरुन वाद झाला आणि या वादाचे रुपांतर हाणामारीत झाले.
गुड्डूने सुरेंद्र आणि त्याच्या पत्नीवर काठ्यांनी हल्ला केल्याचा आरोप आहे. पीडितेचा आरोप आहे की, गुड्डू हा दबंग असून तो जुन्या वादातून सतत भांडण करत असतो. यावेळी अंडरविअर वाळायला घालण्यावरुन वाद झाला आहे. त्याने आधी धमक्या दिल्या, त्यानंतर टोळक्याने येऊन लाठ्या, विटा आणि दगडांनी हल्ला केला. या घटनेत इतर लोकही जखमी झाले आहेत. सर्वांना रुग्णालयात नेण्यात आले. तक्रारीवरून आठ जणांविरुद्ध हत्येचा प्रयत्न केल्याचा गुन्हा दाखल करण्यात आला आहे.