अचानक नोटांचा पाऊस सुरू झाल्याने रस्त्यावरून चालणारे लोक आश्चर्यचकित झाले. कारमध्ये आलेल्या एका व्यक्तीने खिडकीतून नोटांचे बंडल फेकण्यास सुरुवात केली. त्यांनी एक-दोन नव्हे तर दीड कोटींहून अधिक रुपये हवेत उडवले. दुसऱ्यांना काहीतरी गिफ्ट द्यायचं होतं म्हणून असं केल्याचं या व्यक्तीने म्हटलं आहे. अमेरिकेच्या ऑरिगनमध्ये ही घटना घडली आहे.
डेली स्टारच्या वृत्तानुसार, चालत्या कारमधून नोटा फेकणाऱ्या 38 वर्षीय व्यक्तीचे नाव कॉलिन डेव्हिस मॅक्कार्थी असं आहे. कॉलिनने कारच्या खिडकीतून जवळपास दोन हजार डॉलर्स (1 कोटी 63 लाखांपेक्षा जास्त) रोख रक्कम फेकून दिली होती. त्याने नोटांचे बंडल फेकण्यास सुरुवात करताच रस्त्यावरून जाणाऱ्यांनी ते घेण्यासाठी मोठी गर्दी केली.
काही लोकांनी कॉलिनला तसं न करण्याचं आवाहन केलं आहे. कारण त्याच्या या कृतीमुळे अपघात होऊ शकतो. याच दरम्यान, काहींनी घडलेल्या घटनेची माहिती पोलिसांना दिली. माहिती मिळताच पोलिसांनी घटनास्थळ गाठले. पोलिसांच्या पथकाने पाठलाग करून कॉलिनला अडवले आणि नोटांचे बंडल ताब्यात घेतले.
कॉलिन आणि त्याच्या पालकांचे जॉईंट बँक अकाऊंट असल्याचे सांगण्यात आले. या खात्यातून त्यांनी पैसे काढले होते. पैसे घेऊन तो गाडीत बसला आणि नंतर हायवेकडे निघाला. कॉलिनने चालत्या गाडीची खिडकी उघडली आणि नोटांचे एक एक बंडल हवेत उडू लागले. अनेक मार्गावरून जाणाऱ्यांनी नोटा जमा करण्यास सुरुवात केली.
रस्त्यावर वाहनांच्या लांबच लांब रांगा लागल्याचे एका प्रत्यक्षदर्शीने पोलिसांना सांगितले. दरम्यान कारमधून एक व्यक्ती (कॉलिन) नोटा फेकत होती. काही लोक तर रस्त्याच्या मधोमध जाऊन नोटा उचलण्याचा प्रयत्न करत होते. सुदैवाने अपघात झाला नाही. पोलिसांनी कॉलिनवर गुन्हा दाखल केला आहे. तपास केला जात आहे. एका हिंदी वेबसाईटने याबाबतचे वृत्त दिले आहे.
सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"