Crime Jarahatke : अनेक गुन्हेगार पोलिसांपासून लपून राहण्यासाठी एकतर शहर बदलतात किंवा आणखी काही आयडिया लावतात. मात्र, एका गुन्हेगारानं पोलिसांच्या नजरेतून वाचण्यासाठी असा काही कारनामा केला की, त्याची सध्या सोशल मीडियावर चर्चा रंगली आहे. पोलिसांनी जेव्हा त्याला पाहिलं तेव्हा त्यांनाही आश्चर्य वाटलं. जोधपूर शहरातील पोलीस चार महिन्यांपासून एका सराईत गुन्हेगाराचा शोध घेत होते. हा गुन्हेगार महिलेच्या वेषात आढळून आला.
जोधपूर पोलिसांना सूचना मिळाली होती की, हिस्ट्रीशीटर दया शंकर उर्फ बिट्टू जो हत्येच्या प्रयत्नासहीत २७ गुन्ह्यात सहभागी होता. तो त्याच्या घरात लपून होता. पोलिसांची टीम त्याच्या घरी पोहोचली, पण तिथे त्यांना जे दिसलं ते पाहून हैराण झालेत. घराच्या मुख्य दाराला कुलूप लागलेलं होतं. पण खिडकीतून पाहिलं तर आत एक महिला दिसली. या महिलेनं इशारा करून सांगितलं की, बिट्टू घरी नाहीये. पण पोलिसांना संशय आला.
पोलिसांना संशय आला की, बाहेरून कुलूप आहे आणि आत महिला आहे. इतकंच नाही तर पोलिसांना खिडकीजवळ बीअरची बॉटल आणि सिगारेटचे काही तुकडेही दिसले. हे पोलिसांचा संशय आणखी वाढला. पोलिसांनी लगेच 'महिलेला' ताब्यात घेतलं. तिचा पदर जेव्हा काढला तर समोर दया शंकर उर्फ बिट्टू होता. तो साडी, मंगळसूत्र आणि लेडीज अंगठ्या घालून होता. हे सगळं त्यानं पोलिसांना चकमा देण्यासाठी केलं.
चार महिन्यांपासून फरार
पोलिसांनुसार, दया शंकर गेल्या चार महिन्यांपासून फरार होता. आधी तो उदयपूरमध्ये लपून होता. पण अलिकडेच तो घरी परतला होता. त्याला वाटलं की, महिलेच्या वेषात असलं तर पोलीस त्याला ओळखणार नाहीत. पण पोलिसांच्या सतर्कतेमुळे तो पोलिसांच्या जाळ्यात आला.
गुन्ह्याची लांब यादी
दया शंकर उर्फ बिट्टूचा गुन्ह्याचा मोठा इतिहास आहे. त्याच्या आणि त्याच्या भावाविरोधात एकूण २७ गुन्हे दाखल आहेत. ज्यात हत्येचा प्रयत्न, चोरी आणि मारहाण अशा गंभीर गुन्ह्यांचा समावेश आहे. स्थानिक लोक त्यांना घाबरत होते. पण यावेळी त्याची चलाखी कामी आली नाही.