तब्बल 33 तास बेडवर झोपला आणि जिंकली मोठी रक्कम, लोक म्हणाले - गर्लफ्रेंड नसती तर...

Jarahatke : चीनमध्ये जेव्हा ह्याच ‘आरामदायक वाटणाऱ्या’ गोष्टीला खरी स्पर्धा बनवलं, तेव्हा मजा कुठे गायब झाली आणि त्रास कसा सुरू झाला हे पाहणं म्हणजे मजाच!

Jarahatke : कोणी तुम्हाला म्हणालं की, 'फक्त बेडवर पडून रहा, काही करू नका', तर लगेच वाटेल अरे वा! जगातलं सगळ्यात सोपं काम. पण थांबा… चीनमध्ये जेव्हा ह्याच ‘आरामदायक वाटणाऱ्या’ गोष्टीला खरी स्पर्धा बनवलं, तेव्हा मजा कुठे गायब झाली आणि त्रास कसा सुरू झाला हे पाहणं म्हणजे मजाच!

एका गादी बनवणाऱ्या कंपनीने प्रमोशनसाठी एक भन्नाट स्पर्धा आयोजित केली होती. जी बघून लोक थक्क झाले. पण स्पर्धा सुरू होताच कळालं की, केवळ बेडवर झोपणं हे जितकं सोपं दिसतं, त्यापेक्षा कितीतरी अवघड काम आहे. 

अनोखी स्पर्धा जी जगभर व्हायरल झाली

ही अफलातून स्पर्धा चीनच्या इनर मंगोलियातील बाओटो शहरातील एका शॉपिंग सेंटरमध्ये आयोजित करण्यात आली होती. कंपनीचा उद्देश गादीचं प्रमोशन करणं होता, पण स्पर्धा इतकी हटके की सोशल मीडियावर ती क्षणात व्हायरल झाली. स्पर्धेचं नाव होतं “Lying Flat Competition”, म्हणजेच “फक्त लेटून रहा”. लोकांना वाटलं हे कोणतं स्पर्धेचं काम आहे? पण जेव्हा नियम जाहीर झाले… लोकांनी डोकं पकडलं!

अजब आणि कडक नियम

या स्पर्धेत सहभागी बसू शकत नव्हते, बेडवरून उठू शकत नव्हते,  टॉयलेटलाही जाऊ शकत नव्हते! जेवणसुद्धा झोपूनच खायचं, फक्त कड फिरवण्याची परवानगी, पुस्तक वाचू शकतात किंवा मोबाईल वापरू शकतात. काही तर डायपर घालून आले होते! एकूण 240 लोक आले, पण पहिल्याच दिवशी 186 लोक बाहेर झाले. कारण ते धूम्रपानासाठी उठले! 

33 तास 35 मिनिटांची झुंज आणि 23 वर्षांचा विजेता

घड्याळाचे काटे सतत पुढे जात होते आणि स्पर्धक एकामागून एक बाहेर पडत होते. 33 तास झाले तेव्हा मैदानात फक्त तीनजण उरले. इतक्यात आयोजकांनी अजून एक अवघड नियम लागू केला. तो म्हणजे हात-पाय हवेत उचलून ठेवायचे! जो हे जास्त वेळ टिकवेल, तो विजेता! शेवटी 23 वर्षांच्या तरुणाने कमाल केली. 33 तास 35 मिनिटे टिकून स्पर्धा जिंकली.

त्याने सांगितलं की,  “ही स्पर्धेची लिंक माझ्या गर्लफ्रेंडनेच पाठवली होती. ती म्हणाली—‘ट्राय कर, तू जिंकशील!’ मध्ये हार मानावसं वाटलं, पण ती सतत फोनवरून प्रोत्साहन देत होती.”