निकृष्ट दर्ज्याचा कामाचे उदाहरण : अभियंत्यावर कारवाई करण्याची मागणी
लोकमत न्यूज नेटवर्क
जळगाव : शहरातील मु. जे. महाविद्यालय परिसरातील आस्वाद चौकात असलेल्या नाल्यालगत महिभरापूर्वी तयार केलेली संरक्षण भिंत एकाच पावसात ढासळली आहे. या निकृष्ट कामाबाबत या प्रभागातील नगरसेवक नितीन बरडे व अनंत जोशी यांनी याबाबत संबधित काम करणाऱ्या अभियंत्यावर कारवाईची मागणी केली आहे.
मु. जे. महाविद्यालय परिसरातील रामदास कॉलनीच्या बगिच्यापर्यंत नाल्याची संरक्षण भिंत उभारण्यासाठी गेल्या पंचवार्षिकमध्ये निधी मंजूर करण्यात आला होता. या निधीतून काही काम करण्यात आले. परंतु त्यानंतर काम थांबले होते. मात्र, तीन महिन्यांपूर्वी पुन्हा नगरसेवक अनंत जोशी व नितीन बरडे यांनी पाठपुरावा करून मक्तेदाराला काम सुरू करण्यास भाग पाडले होते. हे काम गेल्या महिन्यातच पूर्ण झाले. यात मात्र, अवघ्या एका महिन्यात नाल्याच्या भिंतीचे काम किती तकलादू होते हे उघडकीस आले आहे. गेल्या आठवड्यात झालेल्या पावसामुळे आस्वाद चौकाजवळील दूध सेंटरजवळ नाल्याची भिंत कोसळली आहे. ३० ते ४० फुट बांधकाम नाल्यात पडल्याचे मंगळवारी सकाळी उघडकीस आले. त्यामुळे तातडीने नाल्यातील वेस्ट मटेरिअल बाहेर काढण्यात आले आहे. या निकृष्ट कामाला मनपातील अधिकारी जबाबदार असल्याने संबंधितांवर कारवाई करण्याची मागणी करण्यात आली आहे.