लोकमत न्यूज नेटवर्क
जळगाव : कोरोनाकाळात प्रतिकारशक्ती वाढून आरोग्य उत्तम राहावे, यासाठी ‘मिशन फाॅर हेल्थ’ या उपक्रमांतर्गत नाशिक सायकलिस्ट फाउंडेशनच्या वतीने आयोजित सायकलिंग स्पर्धेत जळगावच्या तीन सायकलिस्टनी वर्षभरात १० हजार कि.मी. अंतर पार केले. यामध्ये जिल्हा नियोजन अधिकारी प्रतापराव पाटील, भारतीय सैनिक नीलेश कोळी व कामिनी धांडे यांचा समावेश आहे. याबद्दल त्यांचा नुकताच सन्मान करण्यात आला.
कोरोना महामारीच्या काळात नागरिकांनी आपल्या आरोग्याची योग्य काळजी घ्यावी यासाठी १८ वर्षांच्या पुढील वयोगटातील व्यक्तींसाठी १ ऑगस्ट २०२० ते ३१ जुलै २०२१ या कालावधीत एक हजार ते १० हजार किलोमीटरचे ‘स्टार सायकलिंग व्हर्च्युअल चॅलेंज’ असे आव्हान ठेवण्यात आले होते. ‘मिशन फाॅर हेल्थ’ या उपक्रमांतर्गत सायकलिस्टने मोठ्या प्रमाणात सहभाग नोंदवला. जे सायकलिंग करतील त्यांची मोबाइल ॲपद्वारे किलोमीटरमध्ये नोंद ठेवण्यात आली. यात एक हजार ९६८ सायकलप्रेमी सहभागी झाले व जवळजवळ एक हजार सायकलिस्टने हे आव्हान उत्स्फूर्तपणे स्वीकारले. ६१ सायकलिस्टने दहा हजार कि.मी. पूर्ण केले. विशेष म्हणजे सात महिलांचाही समावेश आहे. यात जळगावचे जिल्हा नियोजन अधिकारी प्रतापराव पाटील, भारतीय सैनिक नीलेश कोळी व कामिनी धांडे यांनी आव्हान पूर्ण करून विक्रम केला.
सायकलप्रेमी किरण चव्हाण, रॅम विजेते हितेंद्र महाजन, लायन्स क्लब ऑफ काॅर्पोरेटचे अध्यक्ष विनय बिरारी, नाशिक सायकलिस्टसचे संस्थापक अध्यक्ष विशाल उगले, माजी अध्यक्ष प्रवीण खाबिया, मुकेश ओबेराॅय यांच्या प्रमुख उपस्थितीत हे आव्हान पूर्ण करणाऱ्या सायकलिस्टचा सन्मान करण्यात आला.