जळगाव : सहकार चळवळीचे जनक पद्मश्री विठ्ठलराव विखे पाटील यांच्या १२३व्या जयंतीदिनाचे औचित्य साधून देण्यात येणाऱ्या राज्यस्तरीय साहित्य व नाट्य पुरस्कारांची घोषणा पुरस्कार निवड समितीने केली आहे. यात पद्मश्री डॉ.विठ्ठलराव विखे पाटील राज्यस्तरीय नाट्यसेवा पुरस्कार जळगाव येथील लेखक व रंगकर्मी शंभू पाटील यांना जाहीर करण्यात आला आहे.
२५ हजार रुपये रोख आणि स्मृतिचिन्ह असे या पुरस्काराचे स्वरूप आहे. निवड समितीचे अध्यक्ष डॉ.रावसाहेब कसबे व निमंत्रक प्रा.डॉ.राजेंद्र सलालकर यांनी माहिती पत्रपरिषदेत दिली. ३० ऑगस्ट रोजी मराठी साहित्य संमेलनाचे नियोजित अध्यक्ष रवींद्र शोभणे यांच्या उपस्थितीत या पुरस्कारांचे वितरण होईल. खान्देशातील रंगभूमीला पहिल्यांदाच हा पुरस्कार मिळाला आहे.