लोकमत न्यूज नेटवर्क
जळगाव : फटाके फोडणाऱ्या तसेच कर्कश आवाज होणाऱ्या १७ बुलेटचे सायलेन्सर शहर पोलिसांनी काढले होते. त्यावर शनिवारी रोड रोलर फिरविण्यात आले.
टॉवरचौक, स्वातंत्र्य चौक, आकाशवाणी चौक ते काव्यरत्नावली चौक परिसरात काही बुलेट चालकांवर शहर वाहतूक शाखेने कारवाई केली होती. त्यांच्याकडून २२ हजारांचा दंडही वसूल करण्यात आला होता. शनिवारी जप्त केलेले १७ सायलेन्सरवर शहर वाहतूक शाखेच्या वतीने रोड रोलर फिरवून ते नष्ट करण्यात आले.
दरम्यान, ज्या वाहनधारकांनी अश्या आवाज करणारे सायलेन्सर लावले असतील तर त्यांनी काढून घ्यावेत, शहर वाहतूक शाखेकडून विशेष मोहिम राबविण्यात येणार असून अशा प्रकारची वाहने आढळून आल्यास त्यांना जप्त करण्यात येवून परवाना निलंबित करण्यात येणार असल्याची माहिती वाहतूक शाखेचे पोलीस निरीक्षक देवीदास कुनगर यांनी दिली.