जळगाव : धरणगाव कृषी उत्पन्न बाजार समितीच्या निवडणुकीत राष्ट्रवादी कॉग्रेस पक्षाचे नाव व नेत्यांचे फोटो बॅनरवरुन तात्काळ काढावेत, अन्यथा आपणाविरुध्द कारवाई केली जाईल असा इशारा वजा आदेश राष्ट्रवादी कॉग्रेस पक्षाचे प्रदेशाध्यक्ष जयंत पाटील यांनी जिल्हा बँकेचे चेअरमन संजय पवार यांना दिले आहेत.
येत्या २८ एप्रिल रोजी धरणगाव कृषी उत्पन्न बाजार समितीची निवडणूक होत आहे. शिवसेना-भाजप-राष्ट्रवादी प्रणित सहकार पॅनलच्या वतीने निवडणूक लढवित आहात असे बॅनर पवार यांनी लावलेले आहे. आपण पक्षामध्ये कोणत्याही पदावर कार्यरत नाही. राष्ट्रवादी काँग्रेस पक्षामध्ये कोणताही गट नाही, असे असताना संजय पवार गट असा उल्लेख करून आपण पक्षाच्या पदाधिकारी, कार्यकर्त्यांमध्ये संभ्रम निर्माण करीत आहात. त्यामुळे तातडीने राष्ट्रवादी पक्षाचे नाव व नेत्यांचे फोटो काढावेत, अन्यथा आपल्यावर नियमानुसार योग्य ती कार्यवाही करण्यात येईल, असे आदेशाच्या पत्रात म्हटले आहे. संजय पवार यांनी भाजप-शिंदे गटाशी हातमिळवणी करुन जिल्हा बँकेत चेअरमनपद मिळवले आहे. राष्ट्रवादीकडे बहुमत असूनही हातची सत्ता गेल्याने राष्ट्रवादी पक्षात पवारांविषयी प्रचंड असंतोष आहे. त्यापार्श्वभूमीवर जयंत पाटील यांचे आदेश महत्वपूर्ण मानले जात आहेत.