रा.स्व.संघाच्या सेवालयात मुस्लिम तरूणांची नमाज !

जिल्हा रुग्णालयात एकात्मतेचे दर्शन : राम - रहिम भेटीने साजरी झाली अनोखी ईद-ए-मिलादुन्नबी

जळगाव : जिल्हा रूग्णालयाच्या परिसरात असलेल्या रा.स्व. संघ जनकल्याण समितीच्या सेवालयात रविवारी ईद-ए- मिलादुन्नबीच्या निमित्ताने जणू ‘राम - रहिम’ गळाभेट घेत आहेत, असे एकतेचे दर्शन घडले. रूग्णालयात सेवा देण्यासाठी आलेल्या मुस्लीम बांधवांनी नमाजाची वेळ झाल्याने या सेवालयात नमाज पठण केले. हिंदू - मुस्लिम बांधवांनी साजरी केलेल्या ईदचे साक्षीदार झालेले सर्वच याप्रसंगाने सुखावून गेले.अयोध्या प्रश्नावर सन्मानजनक तोडगा निघाल्याने संपूर्ण देशात सौहार्दचे दर्शन घडले आहे.यंदाच्या ईदला यामुळे देशभर एकात्मतेची अनोखी झळाळीही होती. जिल्हाभरात सर्वत्र ईद-ए- मिलादुन्नबी उत्साहात साजरी करण्यात आली़ त्या पार्श्वभूमीवर काही मुस्लीम बांधवांनी जिल्हा रूग्णालयात फळे वाटपाचा कार्यक्रम आयोजित केला होता. यातील काहींनी रा़ स्व़ संघाच्या जनकल्याण समितीच्या सेवालयाच्या सेवेबद्दल माहिती होती़ दोन मुस्लीम बांधवांनी या सेवालयात देणगीही दिली.दरम्यान, रविवारी दुपारच्या सुमारास नमाज पठणाची वेळ झाल्याने या मुस्लीम बांधवांनी सेवालयाच्या कार्यकर्त्यांना या ठिकाणी नमाज पठण करू शकतो का? अशी विचारणा केली़ यावर कार्यकर्त्यांनी त्यांचे आनंदाने स्वागत केले, नमाज पठनानंतर त्यांना ईदच्या शुभेच्छा दिल्या़यावेळी विनायक वाणी, मंगला पाटील, पराग महाशब्दे यांच्यासह कार्यकर्ते उपस्थित होते़ दहा ते बारा मुस्लीम बांधवांनी या ठिकाणी नमाज पठण केले़सेवालयामार्फत दैनंदिन अन्न वाटप केले जात असते. ईदनिमित्त या तरुणांनी आपल्या स्टॉलशेजारीच फळवाटपाचा कार्यक्रम आयोजित केला होता. वेळ झाल्याने त्यांनी नमाज पठणाबाबत विचारणा केली. आम्ही त्यास होकार दिला. आमच्यासाठी हा आनंद आणि गौरवदायी क्षण होता. अयोध्या निकालाच्या पार्श्वभूमीवर देशभरात अशीच सद्भावना वाढीस लागावी.-दीपकराव घाणेकर, रा. स्व. संघाचे ज्येष्ठ स्वयंसेवक.