लोकमत न्यूज नेटवर्कजळगाव : पानभर सुसाईड नोट लिहून इलेक्ट्रीक स्कुटर शोरूममध्ये व्यवस्थापक म्हणून नोकरीला असलेल्या प्रियंका मदन दास (२७, रा. कवाळेनगर, भुसावळ, ह.मु.सिभागवाडी, रिंगरोड) या तरूणीने राहत्या घरात साडीच्या सहाय्याने गळफास घेवून आत्महत्या केल्याची घटना सोमवारी सायंकाळी घडली. याप्रकरणी जिल्हापेठ पोलीस ठाण्यात अकस्मात मृत्यूची नोंद करण्यात आली आहे. दरम्यान, पोलिसांनी सुसाईड नोट ताब्यात घेतली आहे.भुसावळ येथील रहिवासी प्रियंका दास ही शहरातील रिंगरोड परिसरातील एका इलेक्ट्रिक स्कुटर शोरूममध्ये व्यवस्थापक म्हणून नोकरीला होती. दोन वर्षांपासून ती याठिकाणी नोकरी करीत असल्यामुळे तिने जिल्हा बँकेच्या मागील बाजूस राहण्यासाठी भाडेतत्वावर खोली घेतली होती. ती त्याच ठिकाणी एकटी वास्तव्यास असायची. दरम्यान, सोमवारी सायंकाळ होवून सुध्दा प्रियंका ही कामावर आली नाही, म्हणून शोरूममधील कामगार विजय गोकुळे परदेशी हा तिच्या घरी गेला. त्याला दरवाजा आतून बंद दिसून आला. त्यामुळे त्याने खिडकीतून डोकावून पाहिले असता प्रियंका हिने पंख्याला साडीच्या सहाय्याने गळफास घेतल्याचे लक्षात आले.जीवनाचा कंटाळा आलाय...प्रियंका हिने आत्महत्या केल्याचे दिसताच, लागलीच विजय परदेशी याने जिल्हा पेठ पोलिसांना माहिती दिली. जिल्हापेठ पोलीस ठाण्याचे पोलीस निरिक्षक विलास शेंडे, प्रदीप चांदेलकर, पोलीस कर्मचारी करूणासागर जाधव आदींनी काही क्षणात घटनास्थळ गाठले. त्यावेळी त्यांना मृतदेहाजवळ पानभर लिहिलेली सुसाईड नोट मिळून आली. पोलिसांनी ती जप्त केली आहे. जीवनात अनेक धक्के बसताहेत, आता कंटाळा आलाय यासह इतर बाबींचा उल्लेख त्यात असल्याचे पोलिसांनी सांगितले. सायंकाळीच मृतदेह जिल्हा रूग्णालयात हलविण्यात आला़ मंगळवारी शवविच्छेदन होवून मृतदेह कुटूंबियांचे ताब्यात देण्यात आले होते. याप्रकरणी पोलिसात अकस्मात मृत्यूची नोंद करण्यात आली असून पुढील तपास प्रदीप चांदेलकर करीत आहे.