संजय पाटील, लोकमत न्यूज नेटवर्क
अमळनेर (जि. जळगाव) : इंदूरहून निघालेली अमळनेर आगाराची ही नवी बस घाट लागण्यापूर्वी एका ठिकाणी प्रवाशांच्या विश्रांतीसाठी थांबली होती. बस थांबली असली तरी, मृत्यू मात्र बसचा जणू पाठलागच करीत होता की काय, अशी शंका यावी. कारण निंबाजी पाटील व अरवा बोहरी या दोघांनीही आपण दोन-तीन तासांत घरी पोहोचत असल्याचा शेवटचा फोन केला होता, तर अविनाश परदेशी याने वे टू पाडळसरे, असे स्टेटस ठेवले होते. नंतर मात्र अपघाताचा निरोप आल्याने परिवारावर जणू दु:खाचा डोंगर कोसळला आहे.
अविनाश परदेशी हा मुलगी पाहण्यासाठी इंदूर येथे गेला होता. स्थळ पाहून तो परत येत होता. त्याने मोबाईलवरील व्हाॅट्स ॲपवर वे टू पाडळसरे, असे स्टेटस ठेवले होते. त्याचे नातेवाईक मित्रही वाट पाहत होते. मुलगी पसंद पडली की नाही, हे ऐकण्याची सर्वांना उत्सुकता लागली होती. पण, अविनाश हा पाडळसरे येथे आलाच नाही.
आपुले मरण पाहिले म्या डोळा...
इंदूर येथे दोन-चार दिवस मुलाकडे राहून परतणाऱ्या पती निंबाजी पाटील यांची पत्नी आणि मुले वाट पाहत होते. वाटेत बालाघाटनजीक त्यांची बस नर्मदा नदीत कोसळली. निंबाजी पाटील यांच्याकडे असलेल्या आधारकार्डावरून त्यांची ओळख पटली. निंबाजी यांच्याकडे पत्नी कमलबाई यांचेही आधारकार्ड आढळले... आणि मग अपघातात निंबाजी यांना पत्नीसह जलसमाधी मिळाल्याची वार्ता पसरली... ती पिळोद्यापर्यंत पोहोचली....गावातील लोक पाटील यांच्या घराजवळ जमा झाले.... नातेवाइकांचे फोन येऊ लागले....आणि कमलाबाई घरात असल्याची खात्री अनेकांनी करून घेतली... पण त्याआधी बराचवेळ कमलाबाई यांना या घटनेची माहिती देण्यात आली नव्हती. पण शेवटी घरासमोर जमलेली गर्दी पाहून त्या काय ते समजल्या आणि हंबरडा फोडला.
अरवा बोहरा जात होत्या माहेरी अमळनेरला
मूर्तिजापूर (जि. अकोला) येथील अरवा मुर्ताझा बोहरा (२७) या मूर्तिजापूरवरून इंदूर येथील आजारी मावशीला भेटायला गेल्या होत्या. १८ जुलै रोजी इंदूरवरून आपल्या माहेरी अमळनेर येथे जाण्यासाठी अपघातग्रस्त बसमधून प्रवास करीत होत्या; परंतु बस नदीत कोसळून झालेल्या अपघातात त्यांचा दुर्दैवी मृत्यू झाला. अरवा बोहरा यांचा विवाह मूर्तिजापूर येथील हुसैनी हार्डवेअरचे मालक हुसैन उर्फ अख्तर अकबर अली सैफी यांचा मुलगा मुर्ताझा हुसैन सैफी यांच्या सोबत २०१८ मध्ये झाला. अरवा यांचे माहेर अमळनेर असल्याने त्या इंदूरवरून एकट्याच अमळनेरसाठी प्रवास करीत होत्या. एक दिवस माहेरी थांबून १९ जुलै रोजी त्या मूर्तिजापूर येथे परत येणार होत्या. परंतु नियतीला ते मान्य झाले नाही. त्यांच्यावर मधेच काळाने झडप घातली. त्यांच्या या दुर्दैवी मृत्यूची वार्ता मूर्तिजापूर येथे समजताच सर्वत्र शोककळा पसरली.
अमळनेर येथे चालक-वाहकाच्या मृत्यूने हळहळ
अमळनेर आगारातील बसचालक चंद्रकांत एकनाथ पाटील हे रा. ढे कू रोड अमळनेर येथे परिवारासह वास्तव्यास होते. सात ते आठ वर्षांपूर्वी ते अमळनेर आगारात रुजू झाला होते. त्यापूर्वी ते शहादा आगारात नोकरीला होते. त्यांचे वडील ग्रामीण रुग्णालयात चालक होते. ते सेवानिवृत्त झाले असून त्यांचा भाऊदेखील एसटीमध्ये नोकरीला आहे. चंद्रकांत यांना आठ वर्षांची मुलगी असून ती इयत्ता तिसरीला तर चार वर्षांचा मुलगा आहे. त्यांच्या मृत्यूने परिसर व एसटी कर्मचाऱ्यात हळहळ व्यक्त होत होती.
प्रकाश श्रावण चौधरी (रा. शारदा कॉलनी) या वाहकाचा या अपघातात मृत्यू झाला. त्याच्या पश्चात आई-वडील, पत्नी, भाऊ, मुलगा, मुलगी असा परिवार आहे. मुलगा मोठा २२ वर्षांचा बारावी व आयटीआय झाला आहे. मुलगी १७ वर्षांची असून ११ वीला आहे. प्रकाश यांचा भाऊ केंद्रीय सुरक्षा दलाच्या पथकात आहे.
१२ मृतदेह काढले बाहेर : वाहक प्रकाश चाैधरी (४०), चालक चंद्रकांत पाटील (४५), अविनाश परदेशी (अमळनेर), निंबाजी पाटील (६०, अमळेनर), अरवा बोहरा (२७, अमळनेर), राजू तुळशीराम (३५, राजस्थान), जगन्नाथ जोशी (६८, राजस्थान), चेतनराम जागीड (जयपूर), सैफउद्दीन बोहरा (इंदूर), विकास बेहरे (३३, धुळे), कल्पना विकास पाटील (५७, धुळे), रुख्मिणीबाई नारायणलाल जोशी (राजस्थान).
या अपघाताचे कारण शोधण्यासाठी एक समिती नेमण्यात आली आहे. या समितीला तातडीने चौकशी करण्यास सांगितले आहे. अपघातातील सर्व मृतदेह धामणोत येथील ग्रामीण रुग्णालयात ठेवण्यात आले असून, अजूनही शोधमोहीम सुरू आहे. - शेखर चन्ने, व्यवस्थापकीय संचालक, राज्य एसटी महामंडळ