जळगाव शहर मतदार संघात उमेदवारांचा ५ लाख ४९ हजार २९८ रुपये खर्च

सर्व १३ उमेदवारांनी सादर केला खर्चजळगाव : विधानसभा निवडणूक लढविणारे व माघार घेतलेल्या उमेदवारांनी ११ रोजी निवडणूक खर्च सादर केला. यामध्ये निवडणूक रिंगणात असलेल्या एकूण १३ उमेदवारांचा ९ आॅक्टोबरपर्यंत ५ लाख ४९ हजार २९८ रुपये खर्च झाला असून माघार घेतलेल्या ८ उमेदवारांचा माघारीपर्यंत एक लाख ४ हजार २२ रुपये खर्च झाला आहे. विशेष म्हणजे सर्व उमेदवारांनी खर्च सादर केल्याने या वेळी कोणालाही नोटीस काढण्याची वेळ आली नाही.जळगाव शहर मतदार संघात निवडणूक रिंगणात असलेल्या तसेच माघार घेतलेल्या उमेदवारांना निवडणूक खर्च सादर करण्याविषयी जळगाव शहर मतदार संघाच्या निवडणूक निर्णय अधिकारी दीपमाला चौरे यांनी ९ रोजी पत्र काढून ते उमेदवारांना ई-मेल तसेच मोबाईलवर पाठविले होते. त्यात निवडणूक खर्च हिशोब नोंदवही तपासणीसाठी उमेदवार अथवा त्यांच्या प्रतिनिधींनी ११ आॅक्टोबर रोजी सकाळी १० वाजता मनपा इमारतीमध्ये असलेल्या हिशोब शाखेत हजर राहण्याच्या सूचना दिल्या होत्या. त्यानुसार ११ रोजी उमेदवारांचा खर्च सादर होण्यास सुरुवात झाली.यामध्ये भाजपचे उमेदवार सुरेश भोळे यांचा ९ आॅक्टोबरपर्यंत ३ लाख २८ हजार ५३९ रुपये खर्च झाला आहे. त्या खालोखाल राष्ट्रवादी काँग्रेसचे उमेदवार अभिषेक पाटील यांचा ५९ हजार १८३ रुपये, वंचित बहुजन आघाडीचे शफी अ.नबी शेख ३० हजार ९४५ रुपये, मनसेचे जमील देशपांडे यांचा २५ हजार ५६० रुपये, अपक्ष उमेदवार शिवराम पाटील यांचा २७ हजार ४५ रुपये, आशीष जाधव यांचा २० हजार ७६० रुपये, बहुजन समाज पक्षाचे अशोक शिंपी यांचा १० हजार ८७३ रुपये, महाराष्ट्र क्रांती सेनेच्या वंदना पाटील यांचा १० हजार ७०३ रुपये, अपक्ष ललित शर्मा यांचा १० हजार ४०० रुपये, गोकूळ चव्हाण यांचा ६ हजार ८५० रुपये, अनिल वाघ यांचा ५ हजार ७५० रुपये, माया अहिरे यांचा ५ हजार ३७० रुपये, बहुजन मुक्ती पक्षाचे गौरव सुरवाडे ५ हजार ३२० रुपये असा एकूण १३ उमेदवारांचा ५ लाख ४९ हजार २९८ रुपये खर्च झाल्याची माहिती निवडणूक खर्च हिशोब शाखेतून मिळाली.माघार घेतलेल्या उमेदवारांचा एक लाख ४ हजार २२ रुपये खर्चविधानसभा निवडणुकीसाठी अर्ज दाखल करून माघार घेतलेल्या आठ उमेदवारांनीही ११ रोजी खर्च सादर केला. यामध्ये अपक्ष उमेदवारी दाखल केलेल्या व माघार घेतलेल्या सीमा भोळे यांचा २२ हजार ५३९ रुपये खर्च झाला आहे. तसेच अपक्ष डॉ. राधेश्याम चौधरी यांचा १४ हजार ८८९ रुपये, डॉ. शांताराम सोनवणे यांचा १४ हजार ६३० रुपये, अ‍ॅड. गोविंद तिवारी यांचा १० हजार ५०० रुपये, अरुण बोरोले यांचा १० हजार ४७४ रुपये, नारायण अग्रवाल यांचा १० हजार ४०० रुपये, चंद्रकांत बेंडाळे यांचा १० हजार ३४० रुपये, भारतीय राष्ट्रीय काँग्रेसचे शैलेंद्र पाटील यांचा १० हजार २५० रुपये असा एकूण १ लाख ४० हजार २२ रुपये खर्च झाल्याचे सादर करण्यात आले आहे.दुसरी तपासणी १५ रोजीउमेदवारांच्या निवडणूक खर्च नोंदवहीची दुसरी तपासणी आता १५ रोजी होणार असून त्यानंतर १८ आॅक्टोबर रोजी तिसरी तपासणी करण्यात येणार आहे.एकालाही नोटीस नाहीलोकसभा निवडणुकीवेळी वेळेवर खर्च सादर केला जात नसल्याने प्रमुख पक्षांच्या उमेदवारांसह अपक्ष उमेदवारांनाही नोटीस बजावण्यात आल्या होत्या. मात्र आता विधानसभा निवडणुकीच्या पहिल्याच खर्च तपासणीला सर्व उमेदवारांचा खर्च सादर करण्यात आल्याने एकाही उमेदवाराला नोटीस देण्याची वेळ आली नाही.