अंत्ययात्रेसाठी जाणाऱ्या पती-पत्नीवर काळाचा घाला

आंबेवडगाव -मालखेडा दरम्यान अपघात

वरखेडी ता.पाचोरा : पिंपळगाव हरेश्वर येथे अंत्ययात्रेसाठी मोटरसायकलने जाणाºया पती-पत्नीवर अपघातरुपी काळाने घाला घातला. आंबेवडगाव - मालखेडा दरम्यान ट्रकने धडक दिल्याने जामनेर तालुक्यातील देवपिंप्री येथील पती-पत्नी हे दूर फेकले जाऊन जागेवरच गतप्राण झाले.या दुर्घटनेबाबत माहिती अशी की, मधुकर रामकृष्ण खैेरे(वय ५०)व संगीता मधुकर खैरे (वय४५) हे दोघे पती-पत्नी मोटर सायकल क्र.एम.एच.१९/ बी.ए.३४५१ ने पिंपळगाव (हरे.)येथे अंत्ययात्रेसाठी जात असतांना चाळीसगाव येथून खामगावकडे घरातील सामान घेऊन जाणारा ट्रक क्र.एम.एच.०४/ डी.डी.९३१३ ने मालखेडा राखीव जंगल परिसरात पिंपळगाव हरेश्वर पोलीस स्टेशन च्या हद्दीत समोरून जोरदार धडक दिली, ही माहिती प्रत्यक्षदर्शी व सदर मयतांच्या मागेच ३० फुट अंतरावर मोटरसायकलवर असलेले मयताचे जावई महेंद्र मालूकर यांनी दिली.अपघातानंतर तब्बल एक तासाने पिंपळगाव हरेश्वर पोलीस स्टेशनचे पोलीस नाईक शिवनारायण देशमुख हे घटनास्थळी हजर झाले व दोन्ही शव पाचोरा ग्रामीण रुग्णालयात शवविच्छेदनासाठी पाठविले. मयतांच्या पश्चात तीन विवाहित मुली व एक अविवाहित मुलगा आहे.