विलास बारी, लोकमत न्यूज नेटवर्क, जळगाव : गुजरातमधील भूज येथून शौचालयाची भांडे घेऊन मध्यप्रदेश कडे जाणाऱ्या ट्रकचे नियंत्रण सुटल्याने तो आकाशवाणी चौकातील सर्कलला धडकून समोर उभ्या असलेल्या वाहनांवर आदळल्याची घटना रविवारी रात्री १० वाजेच्या सुमारास झाली. यात ट्रक उलटून त्याखाली दुचाकी दाबली असून समोर उभ्या असलेल्या चारचाकी वाहनाचे मोठे नुकसान झाले आहे. या अपघातात ट्रक चालक जखमी झाला आहे.
भूज येथून एक ट्रक (क्र. जीजे १२, बीवाय ६८२३) हा शौचालयाचे भांडे घेऊन मध्यप्रदेशकडे जात होता. रविवार २४ डिसेंबर रोजी रात्री दहा वाजेच्या सुमारास तो आकाशवाणी चौकात आला असताना चालकाचे ट्रकवरील नियंत्रण सुटले व सुरुवातीला तो चौकातील सर्कलला धडकला. तेथून पुढे येऊन पारोळा येथील माजी नगराध्यक्ष करण पवार यांच्या कारवर आदळला.
यात कारचे मोठे नुकसान झाले असून सुदैवाने कारमध्ये बसलेल्या आनंद ठाकूर, नगरसेवक पी. डी. पाटील, दिनेश लोहार यांना कोणतीही दुखापत झाली नाही. कार मालक करण पवार हे काही कामानिमित्त बाजूला गेले होते, अपघात झाल्याचे पाहून त्यांनी १०८ रुग्णवाहिकेला कळविले. ट्रक उलटून चालकाच्या हाताला मार लागला आहे. त्याला रुग्णालयात नेऊन उपचार करण्यात आले.