नांदेड, ता. धरणगाव : नांदेड ग्रामपंचायतीची २८ जुलै २०२१ची मासिक सभा तत्कालीन ग्रामसेवक संजय पाटील यांनी घेतली होती. मात्र, अद्यापपावेतो देखील त्या मासिक सभेचे इतिवृत्त ग्रामपंचायतीच्या प्रोसिडिंग बुकात लिहिलेले नाही, अशी तक्रार ग्रा. पं. सदस्य सुनील सैंदाणे यांनी लेखी निवेदनाद्वारे गटविकास अधिकाऱ्यांकडे केली आहे.
ग्रामपंचायतीची जुलै महिन्याची मासिक सभा २८ जुलै रोजी ग्रामसेवक संजय पाटील यांनी घेतली होती. सभेच्या पाच ते सहा दिवसांनंतर सभेचे इतिवृत्त वाचण्यासाठी संबंधित क्लार्क अतुल बऱ्हाटे यांना प्रोसिडिंग बुक मागितले असता अद्याप प्रोसिडिंग लिहिलेले नाही, असे क्लार्क वारंवार सांगत आहेत. विद्यमान ग्रामसेवक भदाणे यांनीदेखील संजय पाटील यांनी अद्याप प्रोसिडिंग लिहिलेले नसल्याचे सांगितले. हा प्रकार अशोभनीय व मनमानी केल्यासारखा असल्याने या प्रकरणी चौकशी करण्यात यावी, अशी मागणी ग्रा. पं. सदस्य सुनील सैंदाणे यांनी निवेदनात केली आहे.