जळगाव : खान्देशी वांग्याचे भरीत जगप्रसिद्ध करण्यासाठी महाराष्ट्राचे सुप्रसिध्द शेफ विष्णू मनोहर यांनी २१ डिसेंबर रोजी जळगावातील सागर पार्क मैदानावर मराठी प्रतिष्ठानच्या सहकार्याने २५०० किलो भरीत बनविण्याचा विश्वविक्रमला सुरुवात केली आहे. सकाळी ५.३० वाजता वांगे भाजण्यास सुरुवात झाली. विश्वविक्रमाची नोंद गिनीज बुक आॅफ वर्ल्डमध्ये करण्यात येणार आहे.
भरीत बनविण्यासाठी कोल्हापुरात कढई तयार केली गेली. यावल तालुक्यातील बामणोद येथे भरीताच्या वांग्यांची उपलब्धता झाली. सागर पार्क येथे पाच ते सहा हजार नागरिक हा विक्रम बघू शकणार आहेत, अशी व्यवस्था आहे. भरीत बनविण्यासाठी कोल्हापूर येथे ४५० किलो वजनाची कढई तयार केली गेली ती १० बाय १० फुटाची असून तीन फुट खोल आहे. भरीत बनविण्यासाठी लागणारा सराटा ११ फुट लांब असणार आहे. गिनीज बुक आॅफ वर्ल्ड रेकॉर्डनुसार भरीत बनविताना कुठल्याही यंत्राचा वापर होणार नाही. ही प्रक्रिया करत असताना कढईजवळ स्वत: मी आणि देवराम भोळे व दत्तु चौधरी यांच्यापैकी एक जण सोबत असल्याचे मनोहर यांनी सांगितले. पहाटे ५ वाजेपासून भरीताचे वांगे भाजण्याला सुरुवात झाली. पारंपरिक पध्दतीने ही संपूर्ण प्रक्रिया केली जात आहे.
२० डिसेंबर रोजीच बामणोद येथून वांगे आणली आहेत. विक्रमासाठी ३२०० किलो वांगे, १२० किलो तेल सामग्री आधीच मैदानावर उपलब्ध करून देण्यात आली असल्याचे मराठी प्रतिष्ठानचे अॅड. जमिल देशपांडे यांनी सांगितले. या संपूर्ण उपक्रमासाठी ६० महिला, ४० पुरूष तसेच २० सुपरवायझर, २ मुख्यनिरीक्षक असे मनुष्यबळ तैनात आहे़ ४००० किलो पेलणारी चुल भरीत बनविण्यासाठी ४००० किलो वजन पेलणारी चुल तयार करण्यात आली आहे. दोन दिवस चालणाऱ्या या प्रक्रियेचे संपूर्ण व्हिडीओ केले जात आहे, अन् विश्वविक्रमात नोंद घेण्यासाठी पाठविण्यात येणार आहे. शेफ विष्णू मनोहर यांची आकाशवाणी चौकातून ढोल-ताशांच्या गजरात मिरवणूक काढली जाणार आहे. विश्व विक्रमी 2500 किलो भरीताचे होणार विनामूल्य वितरण दुपारी करण्यात येणार आहे.