हबीब चव्हाण -
भुसावळ (जि. जळगाव) : भुसावळ-देवळाली मेमू गाडीला तरसोदजवळ इंजिनमध्ये बिघाड झाल्यामुळे तब्बल पावणेतीन तासांच्या उशिराने मॅन्युअल असिस्टंट लोकोच्या साह्याने गाडी मार्गस्थ झाली. त्यामुळे मुंबईच्या दिशेने धावणाऱ्या पवन, खान्देश आणि हटिया-पुणे या रेल्वे गाड्या तब्बल एक ते दीड तास उशिराने धावल्या.
भुसावळ- देवळाली मेमू गाडी भुसावळ स्थानकावरून निर्धारित वेळेला निघाली. मात्र भादली-जळगाव सेक्शनमध्ये इंजिनमध्ये बिघाड झाला. सायंकाळी ५.४५ वाजता थांबलेली ही मेमू गाडी पावणे तीन तासांनी पुढे गेली. त्या मागे असलेल्या इतर गाड्यांना उशिर झाल्याने प्रवाशांनी चांगलाच संताप व्यक्त केला.
अधिकारी व कर्मचाऱ्यांची टीम घटनास्थळीजळगाव-भादली सेक्शनमध्ये देवळाली मेमूला तांत्रिक बिघाड झाल्यामुळे भुसावळ येथून अधिकारी व कर्मचारी हे घटनास्थळी दाखल झाले होते. त्यांनी युद्ध स्तरावर तांत्रिक बिघाड सुधारण्याचा प्रयत्न केला. अखेर जळगाव येथून मॅन्युअल असिस्टंट लोको मागविण्यात आला व या साह्याने गाडी जळगावकडे रवाना झाली.