जळगाव : नवीन बांधलेल्या घरामध्ये वीज मीटर बसविण्यासाठी व दंडाचे प्रकरण मिटविण्यासाठी एक लाख रुपयांची लाच स्वीकारताना कंत्राटी वायरमन प्रशांत विकास जगताप (३३, रा. जळगाव) याला जळगाव लाचलुचपत प्रतिबंधक विभागाच्या पथकाने सापळा रचून अटक केली. ही कारवाई मंगळवार, ९ जानेवारी रोजी रात्री १० वाजता टॉवर चौकानजीक करण्यात आली. या प्रकरणी शहर पोलिस ठाण्यात गुन्हा दाखल करण्यात आला आहे.
जळगाव शहरातील तक्रारदाराने नवीन घर बांधले. या घरामध्ये वीज मीटर घेण्यासाठी त्यांनी महावितरणकडे अर्ज केला होता. मात्र त्यांच्याकडे मीटर बसवले गेले नव्हते. दरम्यानच्या काळात त्यांच्या घराला महावितरण कंपनीच्या पथकाने भेट दिली. त्यांना चार लाख ६० हजार रुपयांची दंडाची रक्कम भरली, तरच वीज मीटर मिळेल, असा निरोप कंत्राटी वायरमन प्रशांत जगताप याने दिला होता. त्यानुसार तक्रारदारांनी कंत्राटी वायरमनची भेट घेऊन त्यांच्याशी बोलणी केली.
तडजोडीमध्ये हे प्रकरण १ लाख ४० हजार रुपयांमध्ये मिटवतो असे सांगून लाचेची मागणी केली. त्यानंतर तक्रारदारांनी जळगाव लाचलुचपत प्रतिबंधक विभागाकडे तक्रार केली. त्यानुसार लाचलुचपत प्रतिबंधक विभागाचे पोलिस उप अधीक्षक सुहास देशमुख, पोलिस निरीक्षक अमोल वालझाडे, सहाय्यक फौजदार दिनेशसिंह पाटील, सुरेश पाटील, पोलिस नाईक सुनील वानखेडे, बाळू मराठे, पोकॉ राकेश दुसाने यांनी सापळा रचून मंगळवार, ९ जानेवारी रोजी रात्री १० वाजता टॉवर चौकानजीक १ लाख रुपयांची रक्कम स्वीकारताना जगताप याला रंगेहात पकडले. याप्रकरणी शहर पोलिस ठाण्यात गुन्हा दाखल करण्यात आला आहे.