जालना : सदर बाजार पोलिसांनी दोन दिवसांपूर्वीच शहरातील आझाद मैदानाजवळील थिंकिंग कॅफे शॉपमध्ये छापा टाकून चार जोडप्यांना पकडले होते. ही घटना उघडकीस आल्यानंतर याच कॅफे शाॅपमध्ये एका १९ वर्षीय तरुणीवर अत्याचार झाल्याची धक्कादायक घटनासमोर आली आहे. याप्रकरणी संशयिताविरूध्द गुन्हा दाखल करण्यात आला आहे.
जालना शहरातील १९ वर्षीय तरुणी एका कोचिंग क्लासमध्ये अकाउंटंट म्हणून काम पाहते. सदर तरुणीच्या वडिलांच्या मित्राचा मुलगा असलेला संशयित आरोपी हा तिच्या वडिलांच्या मजूर सप्लायच्या व्यवसायात मदत करण्यासाठी कामाला होता. सदर तरुणीच्या वडिलांनी लावलेला फोन उचलत नसल्याने त्यांनी आपल्या मुलीच्या मोबाइलवरून सोहेल यास फोन लावला होता. तरुणीचा मोबाइल नंबर मिळाल्याने त्याने तिच्यावर प्रेमाचे जाळे टाकले होते.
सदर तरुणीला वारंवार फोन करून प्रेमाच्या जाळ्यात अडकविल्यानंतर त्याने आझाद मैदानजवळ असलेल्या थिंकिंग कॅफे शॉपमध्ये नेऊन अत्याचार केला. सदर तरुणीला गर्भधारणा झाली, ही बाब तिने त्याला सांगितली. त्याने तिला गर्भपाताच्या गोळ्या परस्पर आणून दिल्या होत्या. या गोळ्यानेही गर्भपात न झाल्याने पुन्हा त्याने तिला तीन वेळा गर्भपात होण्याच्या गोळ्या दिल्या. डॉक्टरांच्या सल्ल्याशिवाय औषधी घेतल्यामुळे सदर मुलीला मोठ्या प्रमाणात रक्तस्राव होऊन, तिची प्रकृती बिघडली होती. तिला छत्रपती शिवाजी महाराज चौकातील एका खासगी रुग्णालयात दाखल केले व तिथून तो गायब झाला.
घाबरलेल्या तरुणीने आपल्या आई - वडिलांना फोन करून रुग्णालयात बोलावून घेतले. रुग्णालयात तरुणीवर उपचार केल्यानंतर सोमवारी रात्री उशिरा तिने सदर बाजार ठाण्यात तक्रार दिली आहे. याप्रकरणी संशयिताविरूध्द गुन्हा दाखल करण्यात आला असून, पुढील तपास पिंक मोबाइल पथकाचे सहायक पोलिस निरीक्षक इंगेवाड करीत आहेत.