जालना : प्राणघातक शस्त्रे बाळगणाऱ्या एकास पोलिसांनी पाठलाग करुन त्यांच्याकडून धारदार तलवार आणि खंजीर जप्त केली.घटना शुक्रवारी रात्री बसस्थानक ते भोकरदन नाका परिसरात घडली.
सदर बाजार पोलीस ठाण्याचे अधिकारी- कर्मचारी रात्रीच्या साडेदहा वाजेच्या सुमारास बसस्थानक ते भोकरदन नाका रोडवर पेट्रोलिंग करीत असताना, श्याम मुकुंद जमधडे (रा. माळीपुरा) हा पोलिसांना बघताच मोटारसायकलवरून घाईघाईने निघून गेला. काहीतरी गरबड असल्याचे पोलिसांच्या लक्षात येताच त्यांनी दुचाकीचा पाठलाग करुन बसस्थानक परिसरात दुचाकी अडविली. त्याची झडती घेतली असता त्याच्याकडे धारधार खंजीर आढळून आले.
सदर हत्यार कोठून आणले याविषयी अधिक विचारपुस पोलसांनी केल्यानंतर प्रेम मारोती पशेवानी (संभाजीनगर ) यांच्याकडून घेतल्याची माहिती जमधडे यांनी पोलिसांनी दिली. सदर बाजार पोलिसांच्या डीबी पथकाने तातडीने संभाजीनगर येथील प्रेम पेशवानी यांच्या घराची झडती घेतली असता तो सापडला नाही. मात्र, त्याच्या घरातून एक धारदार तलवार पोलिसांनी जप्त केली. या प्रकरणी भारतीय हत्यार कायदा अंतर्गत श्याम जमधडे, प्रेम पेशवानी यांच्या विरुध्द सदर बाजार पोलीस ठाण्यात गुन्हा दाखल करण्यात आला.