जालना- मराठी, हिंदी आणि तमिल चित्रपटातून आपल्या आभिनयाचा ठसा उमटवणारे प्रसिद्ध अभिनेते सयाजी शिंदे यांनी आज अंतरवाली सराटी येथे मनोज जरांगे पाटील यांची भेट घेतलीये. अभिनेते शिंदे आणि जरांगे पाटील यांच्या काही वेळ चर्चा झाली. यावेळी अभिनेते शिंदे यांनी जरांगे यांच्या मराठा आरक्षणाच्या आंदोलनास पाठिंबा दिला.
मनोज जरांगे पाटील मराठा आरक्षणाच्या मुद्द्यावरून चांगलेच आक्रमक झाले आहेत. येत्या 20 जानेवारी रोजी अंतरवाली ते मुंबई आरक्षणासाठी पायी दिंडी काढणार आहेत. दरम्यान, आज सुप्रसिद्ध अभिनेते सयाजी शिंदे यांनी जरांगे पाटलांची अंतरवाली येथे जाऊन भेट घेतली. अभिनेते शिंदे यांनी जरांगे पाटलांसोबत आंदोलनाच्या पुढील दिशेवर चर्चा केली. तसेच मराठा आरक्षणाच्या आंदोलनास पाठींबा दिला.
दरम्यान, दोघांमध्ये विविध विषयांवर सुमारे तासभर चर्चा झाली.सयाजी शिंदे यांनी मनोज जरांगे पाटलांच्या मागणीला पाठिंबा दिला. मराठा आरक्षण लवकर मिळावे अशी मागणी अभिनेते शिंदे यांनी केली.