अमेरिकेतील वॉशिंग्टनमध्ये १४ जूनला होत असलेल्या अमेरिकी सैन्य परेडमध्ये पाहुणे म्हणून पाकिस्तानी सैन्याचे प्रमुख असीम मुनीर यांना बोलविण्यात आले होते. परंतू, व्हाईट हाऊसने आम्ही त्यांना निमंत्रितच केलेले नसल्याचे जाहीर केले आहे. यामुळे आधीच काहीच इज्जत नसलेला पाकिस्तान तोंडावर पडला आहे.
वॉशिंग्टनमधील ही परेड अमेरिकन सशस्त्र दलांच्या २५० व्या वर्धापन दिनानिमित्त आयोजित केली जात आहे. राष्ट्राध्यक्ष डोनाल्ड ट्रम्प यांचा ७९ वा वाढदिवस देखील याच दिवशी आहे. भारत-पाकिस्तान हवाई युद्धानंतर पाकिस्तानने लष्कर प्रमुख असीम मुनीर यांना फील्ड मार्शल केले होते. एकही युद्ध न जिंकलेल्या देशाचा हा लष्करप्रमुख काय म्हणून अमेरिकेच्या लष्करी परेडमध्ये निमंत्रित आहे, हे देखील जगाला पडलेले एक कोडेच होते. आता मात्र या पाकिस्तानने उठविलेल्या अफवाच असल्याचे समोर आले आहे.
असीम मुनीर यांना अमेरिकेत आमंत्रित केल्याच्या वृत्ताचे व्हाईट हाऊसने खंडन केले आहे. व्हाईट हाऊसच्या एका अधिकाऱ्याने असीम मुनीर यांना लष्करी समारंभात सन्माननीय पाहुणे म्हणून आमंत्रित करण्यात आल्या बातम्या फेटाळून लावल्या आहेत. या परेडसाठी अमेरिकेने कोणत्याही परदेशी लष्करी अधिकाऱ्याला आमंत्रित केलेले नाही. हे वृत्त खोटे आहे, असे या अधिकाऱ्याने म्हटले आहे.
पाकिस्तानी माध्यमांनी याची सुरुवात केली होती. असीम मुनीर यांना अधिकृत निमंत्रण मिळाले आहे. ते अमेरिकेत जाऊन लष्करी परेडमध्ये सहभागी होणार, असे सांगण्यात आले होते. या घटनेकडे भारतासाठी धक्का असे पाहिले जात होते. परंतू, आज अमेरिकेनेच पाकिस्तानी प्रपोगेंड्याचा बुरखा फाडला आहे. भारतासह जगभरातील माध्यमांनी यावर टीका केली होती. तर पाकिस्तानी मीडिया मोठ्या उत्साहाने हे वृत्त चालवत होता. परंतू, आता पाकिस्तानी मीडियाचेही हसे झाले आहे.