"आम्ही समाजसेवा करायला आलो नाही, भारतासोबत चीन सारखी...!"; व्यापार करारासंदर्भात अमेरिकेचं मोठं विधान

लँडाउ 'अमेरिका फर्स्ट'चा पुनरुच्चार करत म्हणाले, 'अमेरिका फर्स्ट'चा अर्थ 'अमेरिका एकटा' असा होत नाही. ज्याप्रमाणे राष्ट्राध्यक्ष ट्रम्प अमेरिकेला पुन्हा महान बनवू इच्छित आहेत, त्याच पद्धतीने इतर देशांच्या नेत्यांनीही आपल्या देशाला महान बनवावे, अशी त्यांची अपेक्षा आहे.

भारत-अमेरिका व्यापार करारात अमेरिका आपले राष्ट्रीय हीत सर्वोपरी ठेवेल, असे अमेरिकेचे डेप्युटी सेक्रेटरी ऑफ स्टेट ख्रिस्तोफर लँडौ यांनी स्पष्ट केले आहे. ते म्हणाले, २० वर्षांपूर्वी चीनच्या बाबतीत केलेल्या चुका आता भारतसोबत होऊ देणार नाही. तेव्हा अमेरिकेने आपल्या बाजारपेठा खुल्या केल्या आणि नंतर अनेक क्षेत्रांत चीनने अमेरिकेलाच मागे टाकले.

नवी दिल्ली येथे 'रायसीना डायलॉग २०२६' मध्ये बोलताना लँडाउ म्हणाले, भारताने हे समजून घेणे गरजेचे आहे की, आम्ही तीच चूक पुन्हा करणार नाही. आम्ही बाजारपेठ विकसित करण्यास सांगितले आणि लगेचच तुम्ही आम्हाला अनेक व्यावसायांत मागे टाकू लागलात. असे चीन संदर्भात घडले होते. आता हे भारताच्या बाबतीत टाळले जाईल.

'अमेरिका फर्स्ट' म्हणजे... -लँडाउ 'अमेरिका फर्स्ट'चा पुनरुच्चार करत म्हणाले, 'अमेरिका फर्स्ट'चा अर्थ 'अमेरिका एकटा' असा होत नाही. ज्याप्रमाणे राष्ट्राध्यक्ष ट्रम्प अमेरिकेला पुन्हा महान बनवू इच्छित आहेत, त्याच पद्धतीने इतर देशांच्या नेत्यांनीही आपल्या देशाला महान बनवावे, अशी त्यांची अपेक्षा आहे. हा करार दोन्ही देशांच्या राष्ट्रीय हितांना पूरक अशा सहकार्यावर आधारित असेल.

आता व्यापार करार 'फिनिश लाईन'च्या जवळ -द्विपक्षीय व्यापार कराराबाबत सकारात्मकता व्यक्त करताना लँडाउ म्हणाले, "हा करार आता 'फिनिश लाईन'च्या जवळ आहे. या यशामुळे दोन्ही देशांच्या आर्थिक भागीदारीला मोठी चालना मिळेल. २१ व्या शतकात जगातील सर्वाधिक लोकसंख्येचा देश म्हणून भारताचा उदय निश्चित आहे. ही भागीदारी कोणतीही 'चॅरिटी' नसून दोन्ही देशांच्या फायद्यासाठी आहे. तसेच, "आपण येथे सामाजिक कार्य अथवा चॅरिटीसाठी आलेलो नाही. आपण येथे आहोत, कारण हे आपल्या देशाच्या हिताचे आहे आणि भारताच्याही हिताचे आहे, आपली भागीदारी अधिक घट्ट होवो," असेही लँडाऊ  म्हणाले.