४८ तासांत इराणचे ४ मोठे हल्ले, इस्रायली पंतप्रधानांचं जगाला आवाहन; "आता वेळ आलीय, सर्वांनी..."

इराणने सुमारे ४,००० किमी अंतरावर असलेल्या दिएगो गार्सिया येथील अमेरिका-ब्रिटनच्या लष्करी तळालाही लक्ष्य केले होते.

तेल अवीव -  इराणकडूनइस्रायलवर रविवारी मोठे हल्ले करण्यात आले. त्यात डिमोना आणि अरद शहरावर झालेल्या मिसाईल हल्ल्याची पंतप्रधान नेतन्याहू यांनी पाहणी केली. मागील ४८ तासांत जे घडलंय, त्यामुळे जगासाठी इराण सर्वात मोठा धोका बनला आहे. इराणने सर्वसामान्य लोकांना टार्गेट केले. या परिसरात वृद्ध, लहान मुलांचे डे केअर सेंटरही आहेत. तरीही इराणने इथे मिसाईल डागली. इराण या युद्धात क्लस्टरसारख्या निर्बंध घातलेल्या बॉम्बचाही वापर करत आहे जे आंतरराष्ट्रीय कायद्याचे उल्लंघन आहे असा आक्षेप नेतन्याहू यांनी घेतला आहे.

नेतन्याहू यांनी जगातील नेत्यांना आवाहन केले आहे. ते म्हणाले की, आता वेळ आलीय या लढाईत जगातील इतर देशांनी उघडपणे सहभागी व्हावे. अमेरिका, इस्रायल केवळ स्वत:साठी नव्हे तर जगासाठी ही लढाई लढत आहेत. इतर देश कधीपर्यंत वाट पाहणार आहेत. आता कारवाई करण्याची वेळ आली आहे. जेणेकरून हा वाढणारा धोका रोखला जाऊ शकतो असं त्यांनी जगातील देशांना संबोधित करताना म्हटलं आहे.

तसेच इराणने यरुशलम येथील पवित्र धार्मिक स्थळाला टार्गेट केले आहे. बॅलेस्टिक मिसाइल अशाठिकाणी पडली, जिथे चर्च ऑफ द होली सेपल्चर, अल अक्सा मशिद आणि वेस्टर्न वॉलसारखी अनेक धार्मिक स्थळांची सुरक्षा धोक्यात येऊ शकते. ही तिन्ही ठिकाणी जगातील मोठी धार्मिक स्थळे आहेत. परंतु इराणला त्याचीही पर्वा नाही असा आरोप नेतन्याहू यांनी केला आहे. इस्रायली हवाई दल आणि होम फ्रंट कमांड डिमोना येथील प्राथमिक हल्ल्याची चौकशी करत आहेत. डिमोना हे बेअरशेबाच्या दक्षिण पूर्वेला सुमारे ३० किमी अंतरावर एक शहर आहे. हे शहर शिमोन पेरेस नेगेव न्यूक्लियर रिसर्च सेंटरजवळ आहे, जे इस्रायलच्या सीक्रेट अणुकार्यक्रमाचे एक प्रमुख केंद्र मानले जाते.

इराण तेलासाठी ब्लॅकमेल करतंय

दरम्यान, इराणने सुमारे ४,००० किमी अंतरावर असलेल्या दिएगो गार्सिया येथील अमेरिका-ब्रिटनच्या लष्करी तळालाही लक्ष्य केले होते. इराणची क्षेपणास्त्रे आता युरोपपर्यंत पोहोचू शकतात, ज्यामुळे संपूर्ण जगाला धोका निर्माण झाला आहे. इराणने होर्मुझची सामुद्रधुनी बंद केली असून त्यामुळे तेल पुरवठ्यावर परिणाम झाला आहे. इराण तेलासाठी जगाला ब्लॅकमेल करत आहे असाही नेतान्याहू यांनी आणखी एक गंभीर आरोप केला.