"इस्रायलच्या दबावामुळे इराणवर युद्ध लादले"; अमेरिकन अधिकाऱ्याचा मोठा गौप्यस्फोट, चुकीची माहिती दिल्याचा आरोप

अमेरिकेचे राष्ट्राध्यक्ष डोनाल्ड ट्रम्प यांच्या प्रशासनातील एका बड्या अधिकाऱ्याने दिलेल्या राजीनाम्यामुळे जागतिक राजकारणात खळबळ उडाली आहे.

Joe Kent Resign: अमेरिकेचे राष्ट्राध्यक्ष डोनाल्ड ट्रम्प यांच्या इराणवरील धोरणामुळे घरचा आहेर मिळाला आहे. अमेरिकेच्या नॅशनल काउंटरटेररिझम सेंटरचे प्रमुख जो केंट यांनी मंगळवारी आपल्या पदाचा तडकाफडकी राजीनामा दिला. इराणकडून अमेरिकेला कोणताही धोका नसताना केवळ इस्रायलच्या दबावाखाली येऊन अमेरिकेने हे युद्ध पुकारले आहे, असा गंभीर आरोप केंट यांनी केला आहे.

इस्रायलच्या दबावापोटी युद्ध; जो केंट यांचा आरोप

जो केंट यांनी सोशल मीडिया प्लॅटफॉर्मवर आपली भूमिका स्पष्ट केली. "मी अत्यंत विचारपूर्वक हा राजीनामा देण्याचा निर्णय घेतला आहे. इराणसोबत सुरू असलेल्या युद्धाला माझा पाठिंबा असू शकत नाही. इराणकडून आपल्या देशाला कोणताही धोका नव्हता. इस्रायल आणि अमेरिकेतील त्यांच्या शक्तिशाली लॉबीच्या दबावामुळे आपण हे युद्ध सुरू केले," असे केंट यांनी आपल्या पोस्टमध्ये म्हटले.

ट्रम्प यांना आठवण करून दिली जुन्या घोषणेची आठवण

केंट यांनी ट्रम्प यांच्या २०१६, २०२० आणि २०२४ च्या निवडणूक प्रचारातील अमेरिका फर्स्ट धोरणाची आठवण करून दिली. "जून २०२५ पर्यंत तुम्हाला याची पूर्ण कल्पना होती की, मध्य पूर्वेतील युद्धे म्हणजे एक प्रकारचा सापळा आहे. या युद्धांमुळे अमेरिकेच्या सैनिकांचा विनाकारण बळी जातो आणि आपल्या देशाची अफाट संपत्ती वाया जाते. तुमच्या पहिल्या कार्यकाळात तुम्ही कासिम सुलेमानीचा खात्मा केला आणि आयसीसला हरवले, पण देशाला कधीही न संपणाऱ्या युद्धात ओढले नाही," असे केंट यांनी म्हटले.

चुकीच्या माहितीचा प्रसार केल्याचा दावा

इराण युद्ध हे एका नियोजित चुकीची माहिती पसरवण्याची मोहीमेचा भाग असल्याचे केंट यांनी म्हटले आहे. इस्रायली अधिकारी आणि अमेरिकन मीडियातील काही घटकांनी ट्रम्प यांची दिशाभूल केली. "ज्याप्रमाणे आपल्याला इराक युद्धाच्या संकटात ओढले गेले होते, त्याच रणनीतीचा वापर करून आता इराणविरोधात युद्ध लादले गेले आहे. हा एक खोटेपणा आहे," असा खळबळजनक दावा त्यांनी केला.

जो केंट हे स्वतः एक माजी सैनिक असून त्यांनी ११ वेळा युद्धभूमीवर सेवा बजावली आहे. त्यांची पत्नी शॅनन या देखील एका युद्धात शहीद झाल्या होत्या. "एक गोल्ड स्टार पती म्हणून, ज्याने आपली पत्नी एका इस्रायल युद्धात गमावली, मी अमेरिकेच्या पुढच्या पिढीला अशा युद्धात ढकलण्यास पाठिंबा देऊ शकत नाही ज्याचा देशाला कोणताही फायदा नाही," असेही केंट म्हणाले.

राजकीय पार्श्वभूमी

जो केंट यांची जुलै २०२५ मध्ये या पदावर नियुक्ती झाली होती. ते कट्टर उजव्या विचारसरणीच्या गटांशी संबंधित मानले जातात. मात्र, ट्रम्प प्रशासनाच्या सध्याच्या आक्रमक इराण धोरणामुळे त्यांनी अवघ्या काही महिन्यांतच पायउतार होण्याचा निर्णय घेतल्याने ट्रम्प यांच्या फॉरेन पॉलिसीवर प्रश्नचिन्ह उपस्थित झाले आहेत.