मॉस्को: रशियाच्या हल्ल्यांना प्रत्युत्तर देताना युक्रेनने रविवारी ड्रोनचा मोठ्या युक्तीने वापर केला आणि रशियाची ४१ अत्यंत शक्तिशाली लढाऊ विमाने नष्ट केली. कंटेनरमध्ये ड्रोन भरून ते कंटेनर ट्रकच्या माध्यमातून रशियामध्ये तब्बल ४ हजारांहून अधिक किमी दूरवरील हवाई तळांवर नेण्यात आले आणि त्या ड्रोनचा रिमोटच्या साहाय्याने मारा करण्यात आला. त्यासाठी युक्रेनने वापरलेली रणनीती अतिशय गुप्त आणि धक्कादायक ठरली. ‘ऑपरेशन स्पायडर वेब’ हे नाव मोहिमेला देण्यात आले होते.
युक्रेनच्या संरक्षण सेवेने (एसबीयू) ड्रोन आधीच रशियाच्या सीमेत तस्करी करून पोहोचवले होते. हे ड्रोन ट्रकच्या आतील भागात लाकडी कंटेनरमध्ये अत्यंत कुशलतेने लपवण्यात आले होते. हल्ल्याच्या वेळी या ट्रकच्या छतांवर लपवलेल्या डब्यांचे झाकण रिमोटद्वारे उघडले गेले आणि त्यातून ड्रोन आकाशात झेपावले. त्यानंतर त्यांनी रशियाच्या प्रमुख लष्करी विमानतळांवर एकाच वेळी अचूक हल्ले चढवले. ही संपूर्ण मोहीम इतकी गोपनीय होती की रशियासारख्या तगडी हेर यंत्रणा असलेल्या देशालाही या कारवाईची पुसटशीही कल्पना येऊ शकली नाही.
सात अब्ज डॉलरचे नुकसान
युक्रेनच्या दाव्यानुसार, या हल्ल्यात रशियाची अंदाजे सात अब्ज डॉलर किमतीची विमाने नष्ट झाली आहेत. रशियाने मात्र अद्याप यावर अधिकृत टिप्पणी केलेली नाही.
कशी आखली ‘स्पायडर वेब’ योजना?
या कारवाईचे युक्रेनने तब्बल दीड वर्ष आधी नियोजन केले होते. राष्ट्राध्यक्ष झेलेन्स्की यांनी यावर लक्ष ठेवले. ही आपल्या इतिहासातील सर्वांत लांब पल्ल्याची आणि यशस्वी कारवाई असल्याचे सांगत या मोहिमेचे त्यांनी कौतुक केले. हल्ल्याच्या तयारीसाठी अत्यंत क्लिष्ट लॉजिस्टिक वापरण्यात आले. ड्रोन आधीच रशियन भूभागात गुप्तपणे पोहोचवले गेले होते. ट्रकवर लाकडी केबिनच्या छपराखाली ड्रोन लपवले होते.
६ हजार युक्रेनी सैनिकांचे मृतदेह परत करणार रशिया
रशिया-युक्रेन युद्धावर शांततेचा तोडगा काढण्याच्या दृष्टीने सुरू असलेल्या प्रयत्नांचा एक भाग म्हणून दोन्ही देशांची शिष्टमंडळे तुर्कस्थानची राजधानी असलेल्या इस्तंबूलमध्ये भेटली. युक्रेनच्या राष्ट्राध्यक्ष कार्यालयाचे प्रमुख येरकम यांनी युक्रेनियन मुलांची यादी सादर करत या मुलांना सोडण्याची मागणी केली. दोन्ही देशांनी कैद्यांच्या देवाणघेवाणीवर सहमती दर्शविली आहे. रशिया ६,००० मारले गेलेल्या युक्रेनी सैनिकांचे मृतदेहही परत करणार असल्याचे युक्रेनचे संरक्षण मंत्री उमरोव यांनी सांगितले.
दुसऱ्या महायुद्धानंतर ८० वर्षांनी तिसरे महायुद्ध?
दुसरे महायुद्ध १९३९ साली सुरू होऊन १९४५ साली समाप्त झाले. त्यानंतर ८० वर्षांनी तिसरे महायुद्ध होण्याची भीती पाश्चिमात्य देशांना वाटत आहे. युगोव या संघटनेने सर्वेक्षणातून हा निष्कर्ष काढण्यात आला. येत्या पाच ते दहा वर्षांत तिसरे महायुद्ध होईल, अशी शक्यता नागरिकांना वाटत आहे. रशियासोबत वाढलेला तणाव, अमेरिकेचे परराष्ट्र धोरण, अण्वस्त्रांचा धोका ही त्यामागची कारणे आहेत. युद्धात अण्वस्त्रांचा वापर होईल, असे ७६% लोकांना वाटते. तिसरे महायुद्ध अधिक विनाशकारी असेल, असे लोकांना वाटते.