ब्रिटनचे पंतप्रधान बोरिस जॉन्सन पुढील वर्षी त्यांच्या नव्या इनिंगला सुरुवात करणार आहेत. बोरिस जॉन्सन त्यांची गर्लफ्रेंड कॅरी सायमंडसोबत विवाहबद्ध होणार आहेत. पुढील वर्षी ३० जुलै रोजी दोघं विवाह बंधनात अडकणार असल्याची माहिती समोर आली आहे. या लग्नासाठी आतापासूनच जोरदार तयारीला देखील सुरुवात झाली असल्याचं सांगितलं जात आहे. (UK PM Boris Johnson To Wed Fiancee Carrie Symonds Next Summer Report)
बोरिस जॉन्सन यांच्या नातेवाईक आणि मित्रमंडळींना याबाबत कल्पना देखील दिली गेली आहे. ‘द सन’ या इंग्रजी वृत्तपत्राच्या माहितीनुसार, बोरिस जॉन्सन यांचा विवाह सोहळा नेमका कुठे होणार हे अद्याप समजलेलं नाही. ५६ वर्षीय बोरिस जॉन्सन पंतप्रधान झाल्यानंतर आपल्या ३३ वर्षीय गर्लफ्रेंडसह डाऊनिंग स्ट्रीट येथे राहत आहेत. फेब्रुवारी 2020 मध्ये बोरिस जॉन्सन आणि कॅरी सायमंडस यांचा साखरपुडा झाला होता.
बोरिस आणि कॅरी यांना गेल्याच वर्षी पुत्ररत्नाचा लाभ झाला होता. त्याचं नाव विल्फ्रेड लॉरी निकोलस जॉन्सन असं ठेवण्यात आलं आहे. याआधी जॉन्सन यांचा दोनवेळा विवाह झाला आहे. पण त्यांचे हे दोनही संसार फारकाळ टिकले नाहीत. त्यानंतर आता बोरिस जॉन्सन कॅरी सायमंडस यांच्यासोबत आयुष्याच्या नव्या इनिंगला सुरुवात करणार आहेत.