डोनाल्ड ट्रम्प यांना आता कोणी रोखू शकणार नाही! अमेरिकन सिनेटने इराण युद्ध रोखणारे 'वार पॉवर्स बिल' फेटाळले

US Senate rejects War Powers Bill Iran : इराण-अमेरिका युद्धाच्या पार्श्वभूमीवर अमेरिकेच्या राजकारणातून एक मोठी बातमी समोर आली आहे. राष्ट्राध्यक्ष डोनाल्ड ट्रम्प यांच्या युद्धखोर धोरणांना लगाम घालण्यासाठी आणलेला प्रस्ताव अमेरिकन सिनेटने फेटाळून लावला आहे. 

वॉशिंग्टन: मध्य-पूर्वेतील युद्ध भीषण वळणावर असतानाच अमेरिकेचे राष्ट्राध्यक्ष डोनाल्ड ट्रम्प यांना मोठी राजकीय ताकद मिळाली आहे. इराणवरील लष्करी हल्ले थांबवण्यासाठी आणि ट्रम्प यांचे युद्धाचे अधिकार मर्यादित करण्यासाठी अमेरिकन सिनेटमध्ये आणलेला 'वार पॉवर्स बिल' फेटाळण्यात आला आहे. यामुळे आता इराणविरुद्धच्या लष्करी कारवाया सुरू ठेवण्याचा मार्ग मोकळा झाला आहे.

डेमोक्रॅटिक पक्षाने ट्रम्प यांच्या युद्ध करण्याच्या अधिकारांवर अंकुश ठेवण्यासाठी हा प्रस्ताव मांडला होता. मात्र, सिनेटमधील मतदानात हा प्रस्ताव टिकू शकला नाही, ज्यामुळे ट्रम्प प्रशासनाला मोठा दिलासा मिळाला आहे.

काँग्रेसच्या मंजुरीची गरज नाहीहा प्रस्ताव फेटाळला गेल्यामुळे, आता इराणवर पुढील हल्ले करण्यासाठी ट्रम्प यांना अमेरिकन काँग्रेसच्या वारंवार मंजुरीची आवश्यकता भासणार नाही. ते आपल्या अधिकारात लष्करी निर्णय घेऊ शकतील. बहुतांश रिपब्लिकन खासदारांनी ट्रम्प यांच्या धोरणांचे समर्थन केले असून, इराणचा धोका पाहता लष्करी कारवाई आवश्यक असल्याचे मत व्यक्त केले आहे.

विरोधकांचा इशारादुसरीकडे, हा प्रस्ताव फेटाळल्यामुळे अमेरिका एका मोठ्या आणि अनियंत्रित युद्धाच्या खाईत ढकलली जाण्याची भीती विरोधकांनी व्यक्त केली आहे.

युद्धावर होणारा परिणामसिनेटच्या या निर्णयामुळे आता ट्रम्प प्रशासन इराणमधील महत्त्वाच्या लष्करी आणि अणू तळांवर अधिक आक्रमकपणे हल्ले करू शकते. ट्रम्प यांनी आधीच जाहीर केले आहे की, हे युद्ध आगामी चार आठवडे सुरू राहू शकते. आता कायदेशीर अडथळा दूर झाल्याने इराण-अमेरिका संघर्ष अधिक तीव्र होण्याची शक्यता आहे.