ट्रम्प-पुतिन भेट रद्द; व्हाईट हाऊसने फेटाळले बुडापेस्ट शिखर परिषदेचे वृत्त

अमेरिकेचे राष्ट्राध्यक्ष डोनाल्ड ट्रम्प आणि रशियाचे राष्ट्राध्यक्ष व्लादिमीर पुतिन यांच्यात हंगेरी येथे बैठक होणार होती. या बैठकीत युक्रेन-रशिया युद्ध थांबवण्याबाबत चर्चा होईल असा अंदाज होता. मात्र, आता ही नियोजित बैठक पुढे ढकलण्यात आली आहे. ट्रम्प म्हणाले की, त्यांनी रशियन राष्ट्राध्यक्षांसोबतची त्यांची नियोजित बैठक पुढे ढकलली आहे, कारण त्यांना सध्या त्यांचा वेळ वाया घालवायचा नाही. "मला निरुपयोगी बैठक करायची नाही. मला वेळ वाया घालवायचा नाही, काय होते ते पुढे बघू," ट्रम्प व्हाईट हाऊसमध्ये म्हणाले.

अमेरिकेचे राष्ट्राध्यक्ष डोनाल्ड ट्रम्प आणि रशियाचे राष्ट्राध्यक्ष व्लादिमीर पुतिन यांच्यात नियोजित असलेली भेट सध्यासाठी रद्द करण्यात आली आहे. ट्रम्प यांनी दोन आठवड्यांत हंगेरीची राजधानी बुडापेस्ट येथे पुतिन यांच्याशी भेटण्याची घोषणा केली होती, परंतु आता त्यांनी हा बेत बदलला आहे.

मंगळवारी व्हाईट हाऊसच्या एका अधिकाऱ्याने सांगितले की, आगामी काळात राष्ट्राध्यक्ष ट्रम्प आणि राष्ट्राध्यक्ष पुतिन यांच्या भेटीची सध्या कोणतीही योजना नाही. यापूर्वी सोमवारी दोन्ही नेत्यांमध्ये फोनवर संभाषण झाले होते.

बैठक रद्द झाल्यावर ट्रम्प काय म्हणाले?

भेटीच्या आयोजनात बदल का झाला, या प्रश्नावर ट्रम्प यांनी ओव्हल ऑफिसमध्ये पत्रकारांना सांगितले की, "मला निरुपयोगी बैठक करायची नाही. मला वेळ वाया घालवायचा नाही, म्हणून काय होते ते पाहू."

त्यांनी आपले मत बदलण्यामागे काय कारण आहे, असे विचारले असता ट्रम्प म्हणाले, "समोर बरेच काही चालले आहे. आम्ही काय करणार आहोत ते आम्ही तुम्हाला पुढील दोन दिवसांत सांगू."

दरम्यान, व्हाईट हाऊसच्या माहितीनुसार, बुडापेस्ट शिखर परिषदेच्या तयारीसाठी अमेरिकेचे परराष्ट्र मंत्री मार्को रुबियो आणि रशियाचे परराष्ट्र मंत्री सर्गेई लावरोव्ह यांच्यात नियोजित असलेली बैठकही सोमवारी झालेल्या फोनवरील संभाषणानंतर रद्द करण्यात आली आहे.

युक्रेनियन अधिकाऱ्याचा मोठा दावा: झेलेन्स्कीवर डोनबास सोडण्यासाठी दबाव

ट्रम्प यांनी भेट रद्द करण्याचा निर्णय घेतल्याच्या पार्श्वभूमीवर, एका वरिष्ठ युक्रेनियन अधिकाऱ्याने एएफपीला दिलेल्या निवेदनात महत्वाचा खुलासा केला आहे. या अधिकाऱ्याच्या म्हणण्यानुसार, गेल्या शुक्रवारी वॉशिंग्टनमध्ये अमेरिकेचे अध्यक्ष ट्रम्प आणि युक्रेनचे अध्यक्ष वोलोदिमिर झेलेन्स्की यांच्यात तणावपूर्ण चर्चा झाली. या बैठकीदरम्यान, अमेरिकेच्या अध्यक्षांनी शांततेच्या बदल्यात युक्रेनचे अध्यक्ष झेलेन्स्की यांच्यावर पूर्व डोनबास प्रदेश सोडून देण्यास दबाव आणला.

'हो, ते खरे आहे,' असे उत्तर या युक्रेनियन अधिकाऱ्याने दिले. ट्रम्प यांनी झेलेन्स्कीवर पुतिन यांच्या प्रमुख मागण्यांपैकी एक असलेल्या युक्रेनियन नियंत्रणाखालील भागातून माघार घेण्यासाठी दबाव आणला होता का, असे विचारले असता त्यांनी ही माहिती दिली.

याशिवाय, ट्रम्प यांनी युक्रेनला लांब पल्ल्याची टोमाहॉक क्षेपणास्त्रे देण्यासही नकार दिला आणि करारासाठी त्यांच्यावर दबाव आणला, ज्यामुळे झेलेन्स्की कोणत्याही ठोस निष्कर्षाशिवाय बैठक सोडून गेले. या सर्व घडामोडींमुळे रशिया-युक्रेन युद्ध संपवण्यासाठी राजनैतिक प्रयत्न लांबणीवर पडत आहेत आणि ते एका वर्तुळात फिरत आहेत, असेही या अधिकाऱ्याने नमूद केले.