जगात पहिल्यांदा 'ड्रोन वॉल' बनणार; रशियाला घाबरुन २७ देशांनी निर्णय घेतला, जाणून घ्या कसे करणार काम

मागील काही दिवसापासून ड्रोन वॉलची चर्चा सुरू आहे. यावर आता काम होत असल्याचे दिसत आहे. या तंत्रज्ञानामुळे होणाऱ्या हल्ल्यांना प्रतिसाद मिळणार आहे.

जगभरात युद्धाच्या पद्धती बदलत आहे. पूर्वी जमिनीवरुन हल्ला होत होता. यामध्ये रणगाडा, तोफा, बंदुका यांचा वापर केला जायचा. आता यांची जागा ड्रोनने घेतली आहे. इराण, रशिया आणि तुर्की सारख्या देशांनी ड्रोन वापरात आघाडी घेतली आहे. युक्रेनविरुद्धच्या युद्धात रशियाने पारंपारिक शस्त्रांपेक्षा ड्रोनने जास्त यश मिळवले. महत्त्वाचे म्हणजे, ड्रोन युद्ध कमी खर्चाचे आहे आणि थेट लक्ष्यांवर हल्ला करून यशाची शक्यता जास्त आहे. यामुळे होणाऱ्या संभाव्य नुकसानाबद्दल चिंता देखील वाढली आहे. युरोपमध्ये ड्रोनची भीती प्रचलित आहे. "ड्रोन वॉल" तयार करण्यावर चर्चा करण्यासाठी युरोपियन युनियनने आज डेन्मार्कमध्ये एक बैठक बोलावली आहे.

'अनेकदा संघाला संपवण्याचे प्रयत्न झाले, तरीही संघ वटवृक्षासारखा ठाम उभा आहे'- PM नरेंद्र मोदी

काही दिवसांपूर्वी पोलंडच्या आकाशात रशियन ड्रोन दिसले. पोलंड हा नाटो देश आहे, तरीही तेथे रशियन ड्रोन दिसल्याने खळबळ उडाली आहे. एस्टोनिया आणि रोमानियानेही त्यांच्या आकाशात रशियन ड्रोन दिसल्याबद्दल तक्रार केली आहे. या घटना सप्टेंबरमध्ये घडल्या. त्यानंतर, रशियाच्या सीमेवर असलेल्या देशांनी, जसे की बल्गेरिया, एस्टोनिया, हंगेरी, लाटविया, लिथुआनिया, रोमानिया, पोलंड, स्लोवाकिया, डेन्मार्क आणि फिनलंड यांनी चर्चा केली. या बैठकीत ड्रोन वॉल आवश्यक असेल असा निर्णय झाला. 

या तंत्रज्ञानामुळे ड्रोनच्या प्रवेशाबाबत सिस्टमला तात्काळ सतर्कता मिळेल 

ज्या ड्रोन वॉलवर चर्चा होत आहे त्यामध्ये ड्रोनविरोधी तंत्रज्ञानाचा वापर समावेश आहे. अशा तंत्रज्ञानामुळे ड्रोनच्या प्रवेशाबाबत सिस्टमला तात्काळ सतर्कता मिळेल आणि योग्य प्रतिसाद मिळेल. यामुळे युरोपियन युनियनच्या कोणत्याही भागात रशियन किंवा इतर देशांच्या ड्रोनना त्वरित रोखता येईल. यामध्ये रडार, जॅमर आणि सेन्सरचा वापर समाविष्ट असेल. शिवाय, सर्व ईयू सदस्य देश डेटा शेअरिंगवर सहमत होतील, यामुळे प्रत्येक देश एकमेकांना ड्रोनच्या प्रवेशाची किंवा त्यांच्या स्थितीची माहिती देऊ शकेल.

नाटोचे सरचिटणीस मार्क रुट यांनी सांगितले की, आपण आपल्या आकाशाचे रक्षण केले पाहिजे. यासाठी आपल्याला 'ड्रोन वॉल'ची आवश्यकता आहे. आपण क्षेपणास्त्रांवर अब्जावधी डॉलर्स खर्च करू शकत नाही. ड्रोनचा मुकाबला क्षेपणास्त्रांनी करता येत नाही. म्हणून, आम्ही ड्रोन वॉल प्रस्तावावर चर्चा करत आहोत, याचा खर्चही कमी असेल. सध्या, ड्रोन वॉल प्रत्यक्षात कशी दिसेल, ती कधी पूर्ण होईल आणि त्यासाठी किती खर्च येईल हे स्पष्ट नाही. सध्या रशियन ड्रोनचा सामना करणाऱ्या युक्रेनच्या अनुभवांचा वापर ही वॉल विकसित करण्यासाठी देखील केला जाऊ शकतो.