लंडन : ब्रिटनची महाराणी एलिझाबेथ (द्वितीय) यांच्या निधनानंतर राजे झालेले चार्ल्स (तिसरे) यांची फजिती झाल्याचा आणि त्यानंतर ते संतापल्याचा आणखी एक व्हिडीओ व्हायरल झाला आहे. सही करताना पेनमधून शाई गळाली आणि त्यानंतर त्यांचा संताप अनावर झाल्याचे पाहायला मिळाले. अलीकडच्या दिवसांत दुसऱ्यांदा त्यांची चिडचिड कॅमेऱ्यासमोर दिसली. शनिवारी लंडनमध्ये टेबलावर पेनचे फोल्डर बघून चिडलेल्या चार्ल्स यांनी हातवारे करून सहायकाला टेबल साफ करण्यास सांगितले होते.
कुठे घडला प्रसंग? मंगळवारी राजे चार्ल्स उत्तर आयर्लंडमधील बेलफास्टजवळील हिल्सबॉरो कॅसल येथे आले होते. इथे ते व्हिजिटर्स डायरीवर स्वाक्षरी करीत होते. त्या वेळी हा प्रसंग घडला.
काय म्हणाले राजे? ‘अरे देवा, हे (पेन) मला अजिबात नाही आवडत’, असे रागात म्हणत ते खुर्चीवरून उठले. गळके पेन त्यांनी पत्नी कॅमिला यांच्याकडे दिले. यानंतर खिशातून रुमाल काढून बोटे पुसू लागले. ते पाहून ‘बघा ती (शाई) सगळीकडे पसरतेय,’ असे राणी म्हणाल्या. त्यावर, ‘अशा वाह्यात गोष्टी मी सहन करू शकत नाही’ असे राजे जोरात ओरडले आणि निघून गेले. नंतर राणीने स्वाक्षरी केली.