तैवान आणि चीन यांच्यात पुन्हा एकदा तणाव वाढला आहे. गुरुवारी रात्रीपासून शुक्रवारी सकाळपर्यंत चीनने तैवानच्या दिशेने ७४ लढाऊ विमाने पाठवली, ज्यातील ६१ विमाने तैवानची मिडलाइन पार केली होती. ही सीमा अनौपचारिक मानली जाते, जी तैवान आणि चीनला अंतर राखण्याचे संकेत देते. चीनची लढाऊ विमाने दोन वेगवेगळ्या ग्रुपमध्ये पाठवली होती. इतक्या मोठ्या संख्येने लढाऊ विमाने का पाठवली हे अद्याप स्पष्ट नाही असं तैवानच्या संरक्षण मंत्रालयाकडून सांगण्यात आले आहे.
चीननं दाखवली ताकद, तैवानला घेरण्याची धमकी?
चीन तैवानला त्यांचाच भाग मानते, त्यामुळे या प्रकारच्या सैन्य कारवाईमुळे तैवानला घेरण्याची अथवा घाबरण्याचा प्रयत्न करत असते. चीन तैवानच्या सैन्याला आणि जनतेला मानसिक कमकुवत करू इच्छिते असं तज्ज्ञ सांगतात. जेणेकरून संभाव्य संघर्षात त्यांना मानसिक बळ मिळू नये. यावेळी लढाऊ विमानांसोबतच ६ चिनी सैन्य जहाजही पाहण्यात आले.
ब्रिटनच्या जहाजाच्या एन्ट्रीने चीन संतापला?
या तणावामागे आणखी एक पैलू आहे तो म्हणजे ब्रिटनची उपस्थिती, एक दिवसाआधीच ब्रिटन रॉयल नेव्हीचे पेट्रोल क्राफ्ट HMS Spey तैवान स्ट्रेटवरून गेले. तैवानच्या परराष्ट्र मंत्रालयाकडून त्यांचे उघडपणे स्वागत करण्यात आले. त्यामुळे ही तैवानची सागरी सीमा आहे हे स्पष्ट झाले. तर HMS Spey चे मिशन आंतरराष्ट्रीय कायदे आणि सागरी अधिकारांमधून झाले आहे असं ब्रिटनने म्हटले.
चीनला मिरची का झोंबली?
ब्रिटनच्या या पाऊलामुळे चीनचा थयथयाट झाला आहे. चीनच्या पीपल्स लिबरेशन आर्मीने ईस्टर्न थिएटर कमांडने निवेदन जारी करत म्हटलंय की, त्यांनी HMS SPey च्या हालचालींवर नजर ठेवली आणि त्यांचा सामना करण्यासाठी पर्यायी सैन्य कारवाई केली होती. ब्रिटीश जहाज जाणुनबुजून तैवानच्या शांतता आणि स्थिरतेला नुकसान पोहचवत आहे असं चीनने म्हटले. परंतु चीनने इतक्या मोठ्या प्रमाणात लढाऊ विमाने का पाठवली, ती ब्रिटनला उत्तर देण्यासाठी होती की नाही याबाबत स्पष्ट कुणी सांगितले नाही.