आत्मसमर्पण करा, अन्यथा तुम्हाला..; डोनाल्ड ट्रम्प यांचा झेलेन्स्कींना थेट इशारा

White House Meeting: ट्रम्प आणि झेलेन्स्की यांच्यातील बैठक अत्यंत तणावपूर्ण आणि आक्रमक वातावरणात पार पडली.

Zelensky Meeting Trump: व्हाइट हाऊसमध्ये १७ ऑक्टोबर रोजी अमेरिकेचे राष्ट्राध्यक्ष डोनाल्ड ट्रम्प आणि युक्रेनचे अध्यक्ष वोलोदिमीर झेलेन्स्की यांच्या भेटीने संपूर्ण जगाचे लक्ष वेधून घेतले आहे. या भेटीचा उद्देश रशिया-युक्रेन युद्धाचा पुढील मार्ग, संभाव्य तह आणि अमेरिकेची भविष्यातील भूमिका होता. मात्र, ही बैठक अत्यंत तणावपूर्ण आणि आक्रमक वातावरणात पार पडल्याची माहिती मिळत आहे.

मीडिया रिपोर्टनुसार, चर्चेदरम्यान ट्रम्प यांनी रशियाचे राष्ट्राध्यक्ष व्लादिमीर पुतिन यांचे तर्क जवळपास शब्दशः पुनरुच्चारित केले. त्यांनी झेलेन्स्कींना स्पष्ट शब्दांत खडसावले की, “जर युक्रेनने रशियाशी तह केला नाही, तर पुतिन पूर्णपणे उद्ध्वस्त करतील.”

झेलेन्स्की यांनी युद्धस्थिती समजावण्यासाठी नकाशा दाखवण्याचा प्रयत्न केला असता, ट्रम्प यांनी तो नकाशा टेबलवर फेकून दिला आणि तिरकसपणे विचारले की, “ही लाल रेषा म्हणजे काय? मला हे ठिकाण कुठे आहे हेच माहित नाही!” यादरम्यान, दोन्ही बाजूंचे सल्लागार वारंवार मध्ये येऊन चर्चा शांत करण्याचा प्रयत्न करत होते.

अमेरिकेतील राजकीय मतभेद आणि ट्रम्पची भूमिका

ही बैठक अशा वेळी झाली, जेव्हा अमेरिकेत युक्रेनला दिल्या जाणाऱ्या लष्करी मदतीवर तीव्र राजकीय मतभेद आहेत. ट्रम्प यांनी पूर्वीच सार्वजनिकरित्या म्हटले होते की, “मी पुन्हा सत्तेत आलो, तर रशिया–युक्रेन युद्ध २४ तासांत संपवीन.” हा दावा वॉशिंग्टन आणि कीव दोघांसाठीही चिंता निर्माण करणारा मानला गेला.

झेलेन्स्कींचा ठाम प्रतिवाद

झेलेन्स्की यांनी विरोध दर्शवित सांगितले की, “युक्रेनची सार्वभौमत्व आणि सीमा कोणत्याही सौदेबाजीचा विषय होऊ शकत नाही.” यावर ट्रम्प यांनी कठोर भाषेत प्रत्युत्तर दिले की, “जर तू आता सौदा केला नाहीस, तर सर्व काही संपून जाईल.” या वक्तव्याने उपस्थित अमेरिकन आणि युरोपीय राजनयिकांमध्ये खळबळ माजली आणि बैठक कोणत्याही संयुक्त निवेदनाशिवाय संपली.