युक्रेनमध्ये विध्वंस सुरूच असून या युद्धात अनेक निष्पाप लोकांना आपला जीव गमवावा लागला आहे. रशियन सैन्याने निरपराध लोकांची हत्या केल्याचा युक्रेनचा दावा आहे. अनेक शहरे उद्ध्वस्त झाली आहेत. याच दरम्यान मन सुन्न करणारी एक घटना घडली आहे. एका आईने फक्त बुटावरून आपल्या लेकाचा मृतदेह ओळखला आहे. युद्धात आपला लेक गमावलेल्या आईचे अश्रू थांबण्याचे नाव घेत नाहीत. मुलाचा मृतदेह पाहून तिला मोठा धक्का बसला. या आईला आपल्या मुलाचा मृतदेह पेट्रोल पंपामागे सापडला. तिने फक्त बुटावरून मुलाचा मृतदेह ओळखला.
मुलाचा मृतदेह पाहताच माझा छोटा मुलगा म्हणत तिने आक्रोश केला. शेजारीच असलेल्या एका व्यक्तीने मुलाच्या आईला मागे खेचण्याचा प्रयत्न केला. मात्र थोड्या वेळ तरी मला मुलाला बघू द्या, असं म्हणत महिलेने तिला पाहण्यासाठी विनंती केली. रशियन सैन्याच्या हल्ल्यात मृत्युमुखी पडलेला हा मुलगा 23 वर्षांचा होता. एका हिंदी वेबसाईटने याबाबतचे वृत्त दिले आहे. युक्रेनमधील परिस्थिती अत्यंत भीषण झाली आहे. रशियन सैन्याने क्रूरतेचा कळस गाठला आहे. अंगावर काटा आणणाऱ्य़ा अनेक घटना आणि थरकाप उडवणारे अनेक फोटो हे सातत्याने समोर येत आहेत.
बूचा शहरात रस्त्यावर मृतदेह पडले आहेत. यानंतर आता धक्कादायक माहिती समोर आली आहे. रशियन सैन्याने बूचा शहरात टॉर्चर चेंबर तयार केले आहेत. जिथे मृतदेहांचे हातपाय बांधून ठेवण्यात आले आहेत. मारियूपोल, खारकीव्हनंतर आता बूचा शहर उद्ध्वस्त झालं आहे. युक्रेनमधील लोकांना त्रास देण्यासाठी बूचाच्या चिल्ड्रन हेल्थ रिसॉर्टच्या बेसमेंटमध्ये टॉर्चर चेंबर बनवलं आहे. या बेसमेंटमध्ये पाच लोकांचे मृतदेह आढळून आले असून मृतदेहांची अवस्था अत्यंत वाईट आहे. मृतदेहांचे काही भयंकर फोटो आता समोर येत आहेत. युक्रेनने दावा केला आहे की रशिया बूचा शहरात नरसंहार करत आहे. आतापर्यंत 300 हून अधिक सामान्य नागरिकांना मारलं आहे. तसेच लोकांचं मोठ्या प्रमाणात नुकसान झालं आहे.
युक्रेनमधील लोक भीतीच्या सावटाखाली जगत आहेत. बूचा शहरात सध्या वीज, पाणी आणि गॅसची सध्या कोणतीही व्यवस्था नाही. अनेक लोक घर सोडून पळून गेले आहेत. रशियन सैन्य बूचा शहरात लोकांवर अमानुष अत्याचार करत आहेत. लोकांचे हात-पाय बांधून त्यांच्यावर गोळ्या झाडल्या जात आहेत. घरामध्ये असलेल्या लोकांना बाहेर काढून त्यांचा मोबाईल तपासला जात आहे. रशियन सैनिक महिला आणि मुलींवर अत्याचार करत आहेत. याच दरम्यान युक्रेनमध्ये एका 10 वर्षांच्या चिमुकलीवर बलात्कार करण्यात आला असून तिला लोखंडी सळीने चटके दिल्याची धक्कादायक घटना समोर आली आहे.