उत्पादन क्षेत्रात काम केल्यानंतर यामादा वयाच्या ६०व्या वर्षी निवृत्त झाले आणि त्यांना त्यांच्या बचतीसह ५० दशलक्ष येन म्हणजे सुमारे ३ कोटी रुपये पेन्शन मिळाली. मात्र, हातात एवढे पैसे आल्यावर त्यांनी वेगळीच योजना आखली. मात्र, आता त्यांना याचा पश्चात्ताप होत आहे.
जपानमधील तेत्सु यामादा नावाच्या एका वृद्ध पुरुषाने निवृत्तीनंतर आपल्या पत्नीपासून वेगळे राहण्याचा निर्णय घेतला. परंतु, त्याचे नियोजन अयशस्वी झाले आणि त्यांचे सगळे प्लॅनिंग फसले. त्यांची पत्नी आता आनंदी जीवन जगत आहे, परंतु तो एकाकीपणाने त्रस्त आहे. जपानमध्ये पत्नीपासून वेगळे होण्याच्या या संकल्पनेला सोत्सुकोन म्हणतात. यामध्ये, जोडपे विवाहित असतात, परंतु वेगवेगळे राहतात. २००४ मध्ये पहिल्यांदा आलेली ही संकल्पना आता वृद्ध जोडप्यांमध्ये सामान्य झाली आहे.
उत्पादन क्षेत्रात काम केल्यानंतर यामादा वयाच्या ६० व्या वर्षी निवृत्त झाले आणि त्यांना त्यांच्या बचतीसह ५० दशलक्ष येन (सुमारे ३ कोटी रुपये) पेन्शन मिळाली. या पैशांसोबत ते त्यांची पत्नी केइकोसोबत त्यांच्या गावी जाऊ इच्छित होते. त्यांचे जुने घर अजूनही चांगल्या स्थितीत होते. टोकियोमधील शहरी जीवनाची सवय असलेल्या केइकोने यासाठी नकार दिला. त्यांचे दोन्ही मुलगेही टोकियोमध्ये राहत होते आणि काम करत होते. त्यांनी सोत्सुकोनला सुचवले, जे यामादाला घटस्फोटापेक्षा सोपे वाटले म्हणून त्यांनी ते स्वीकारले. मात्र,पुढे त्यांच्या नियोजनाप्रमाणे काहीच घडले नाही.
यामादाने त्याच्या पेन्शनने घराचे नूतनीकरण केले आणि शांत जीवन जगण्याचा निर्णय घेतला. साउथ चायना मॉर्निंग पोस्टनुसार, त्याला त्याच्या पत्नीशिवाय घरातील कामे करण्यात अडचण येत होती आणि तो इन्स्टंट नूडल्स आणि फ्रोजन भाज्यांवर जगत होता. दरम्यान, त्याची पत्नी केइको टोकियोमधील तिच्या हस्तनिर्मित कार्यशाळेत काम करत होती. ते कधीकधी ऑनलाइन कनेक्ट होत असले तरी, मुलांशी क्वचितच बोलायचे.
यामादा म्हणाले की, "असं वाटत आहे की, माझी पत्नी माझ्याशिवायही ती खूप आनंदी दिसते." मात्र, आपल्याला एकटेपणामुळे पश्चात्ताप होत असल्याची कबुली त्यांनी दिली. त्यांना असे वाटते की, कुटुंबाला आता त्यांची गरज नाही. यावर आता सोशल मीडियावर विविध प्रतिक्रिया येत आहेत. एका वापरकर्त्याने म्हटले की, यामादाला वाटले की तो एक नवीन जीवन सुरू करत आहे, परंतु कुटुंब सोडणे त्याच्यासाठी एक मोठी चूक ठरले.