इराण युद्धामुळे पाकिस्तानची कंबर मोडली! पेट्रोल ३०० रुपये लिटर, पंपावर लागल्या रांगा

आधीच महागाईने होरपळणाऱ्या पाकिस्तानी जनतेवर आता इंध दरवाढीचा नवा बॉम्ब पडला आहे.

सध्या जगभरात इराण-इस्रायल युद्धाची चर्चा सुरू आहे. एकीकडे इराण, इस्रायल आणि अमेरिका हे देश प्रत्यक्ष युद्ध भूमीत उतरले असले तरी, दुसरीकडे या युद्धाची झळ इतर देशांना देखील लागली आहे. इराणने या युद्ध काळात होर्मुझ सामुद्रधुनीवर निर्बंध लादल्याने या मार्गाने होणारी तेल वाहतूक ठप्प झाली आहे. याचे परिणाम जगभरातील इतर देशांना भोगावे लागत आहे. तेलाची वाहतूक ठप्प झाल्याने तेल आणि इंधनाच्या किंमती प्रचंड वाढल्या आहेत. या सगळ्या दरम्यानच, भारताचा शेजारी देश अर्थात पाकिस्तानची आणखी कोंडी झाली आहे. 

अमेरिका-इस्राइल आणि इराण यांच्या युद्धात पाकिस्तानचे दिवाळे निघाले आहे. जगभरात कच्च्या तेलाच्या किमती गगनाला भिडत असतानाच आता पाकिस्तानवर आणखी एक संकट कोसळले आहे. आधीच महागाईने होरपळणाऱ्या पाकिस्तानी जनतेवर आता इंध दरवाढीचा नवा बॉम्ब पडला आहे. पाकिस्तान सरकारने रविवारी एक मोठा निर्णय घेत 'हाय-ऑक्टेन' इंधनावरील करात प्रचंड वाढ केली असून, आता हे इंधन ३०० रुपये प्रति लिटरवर पोहोचले आहे.

एका झटक्यात २०० रुपयांची वाढ

पाकिस्तानी पंतप्रधान कार्यालयाने जारी केलेल्या प्रसिद्धीपत्रकानुसार, पंतप्रधान शहबाज शरीफ यांच्या अध्यक्षतेखाली झालेल्या बैठकीत हा निर्णय घेण्यात आला. लक्झरी गाड्यांमध्ये वापरल्या जाणाऱ्या हाय-ऑक्टेन इंधनावर यापूर्वी १०० रुपये प्रति लिटर लेव्ही आकारली जात होती, ती आता थेट २०० रुपयांनी वाढवून ३०० रुपये करण्यात आली आहे. या निर्णयामुळे पाकिस्तान सरकारला दरमहा ९ अब्ज रुपयांची बचत होणार असल्याचा दावा केला जात आहे. हा पैसा सर्वसामान्य जनतेला दिलासा देण्यासाठी वापरला जाईल, असेही सरकारने म्हटले आहे.

पेट्रोल पंपांवर लोकांच्या उड्या

किंमती वाढणार असल्याची घोषणा होताच पाकिस्तानमधील प्रमुख शहरांतील पेट्रोल पंपांवर लोकांच्या रांगा लागल्या. महागडे तेल खरेदी टाळण्यासाठी नागरिक आपल्या गाड्यांच्या टाक्या भरून घेण्यासाठी धावपळ करताना दिसले. सध्या ही वाढ केवळ हाय-ऑक्टेन इंधनासाठी करण्यात आली असली, तरी सामान्य गाड्यांसाठी लागणाऱ्या पेट्रोल-डिझेलच्या टंचाईमुळे जनता चिंतेत आहे.

युद्धाचा पाकिस्तानवर दुहेरी फटका

इराण युद्ध सुरू झाल्यापासून पाकिस्तानमध्ये इंधनाचे दर सतत वाढत आहेत. ६ मार्च रोजी पेट्रोल आणि डिझेलच्या किमतीत ५५ रुपयांची वाढ करण्यात आली होती. याशियाय मंत्र्यांपासून ते सरकारी कर्मचाऱ्यांपर्यंत सर्वांच्या पगारात कपात करण्यात आली आहे. सरकारी गाड्यांसाठी मिळणाऱ्या इंधन भत्त्यात ५० टक्क्यांची कपात करण्यात आली आहे.

इंधन वाचवण्यासाठी आठवड्यातून केवळ चार दिवस काम करण्याची तरतूद करण्यात आली असून, ५० टक्के सरकारी कर्मचाऱ्यांना घरून काम करण्याचे आदेश देण्यात आले आहेत. पाकिस्तानमधील ही परिस्थिती पाहता, इराण-इस्रायल युद्ध लांबल्यास तिथल्या नागरिकांचे जगणे अधिक कठीण होणार असल्याचे स्पष्ट दिसत आहे.