अमेरिकेच्या गुप्तचर यंत्रणांच्या एका अहवालामधून पाकिस्तानबाबत धक्कादायक माहिती समोर आली आहे. पाकिस्तान अमेरिकेपर्यंत मारा करू शकेल असं अण्वस्त्रवाहू आंतरखंडीय बॅलेस्टिक क्षेपणास्त्र तयार करत असल्याचा दावा या अहवालामधून करण्यात आला आहे. ही माहिती अमेरिकेमधील फॉरेन अफेअर्स या प्रतिष्ठित नियतकालिकामधून प्रसिद्ध झाला आहे. भारताने राबवलेल्या ऑपरेशन सिंदूरनंतर पाकिस्तान चीनच्या पाठिंब्याने आपल्याकडील अण्वस्त्रांचं आधुनिकीकरण करण्याचा प्रयत्न करत असल्याचेही या अहवालात म्हटले आहे.
दरम्यान, अमेरिकन अधिकाऱ्यांच्या हवाल्याने या रिपोर्टमध्ये म्हटले आहे की, जर पाकिस्तान असं क्षेपणास्त्र तयार करणार असेल तर आमेरिकेला नाईलाजास्तव पाकिस्तानला आण्विक शत्रू म्हणून घोषित करावं लागेल. अण्वस्त्रे असलेला कुठलाही देश जाच्यापासून अमेरिकेला धोका उदभवू शकतो, अशा देशाला अमेरिकेकडून आण्विक शत्रू म्हणून घोषित केलं जातं. सद्यस्थितीत रशिया, चीन आणि उत्तर कोरियाला अमेरिकेचे आण्विक शत्रू मानले जाते.
या रिपोर्टमध्ये एका अमेरिकन अधिकाऱ्याने सांगितले की, जर पाकिस्तानने असं क्षेपणास्त्र तयार केलं तर अमेरिकेकडे त्याला आण्विक शत्रू घोषित करण्याशिवाय कुठलाही पर्याय नसेल. अमेरिकेपर्यंत मारा करू शकेल, असं आंतरखंडीय क्षेपणास्त्र जवळ बाळगणारा कुठलाही देश हा अमेरिकेचा मित्र असू शकत नाही, असेही या अधिकाऱ्याने स्पष्ट केले.