पाकिस्तानी एअरलाइन्स PIAचा नवा मालक कोण होणार? 'या' कंपनीने लावली तब्बल १० लाख कोटींची बोली

Pakistan Economic Crisis, PIA issue: तोट्यात असल्याने सरकारला विमान कंपन्यांचे व्यवस्थापन करणे झाले कठीण

Pakistan Economic Crisis, PIA issue: पाकिस्तान सध्या आर्थिक स्तरावर फारच डबघाईला आले आहे. पैसे कमावण्यासाठी आणि लोन मिळवण्यासाठी पाकिस्तान सरकार काहीही करू शकते याची सर्वांनाच कल्पना आहे. खराब व्यवस्थापन, विमानांची कमतरता, प्रवाशांच्या तक्रारी आणि मोठ्या प्रमाणात कर्ज यामुळे पाकिस्तानची राष्ट्रीय विमान कंपनी PIA (Pakistan International Airlines) गेल्या अनेक वर्षांपासून अत्यंत अडचणीत आहे. पीआयएच्या प्रतिष्ठेला सर्वात मोठा धक्का २०२० मधील कराची विमान अपघात होता. या अपघातानंतर, असे आढळून आले की २६० हून अधिक PIA वैमानिकांकडे संशयास्पद किंवा बनावट परवाने होते. अनेक देशांनी PIAच्या उड्डाणांवर बंदी घातली. तोट्यात असल्याने सरकारला विमान कंपन्यांचे व्यवस्थापन करणे कठीण झाले आहे. त्यामुळे कंपनी विकायला काढण्यात आली. त्यासाठी आता निविदा मागवल्या गेल्या असून, त्याची मालकी कोणाकडे जाणार याबाबत चर्चा रंगल्या आहेत.

कुणाची कितीची बोली?

पाकिस्तानच्या राष्ट्रीय विमान कंपनी (पीआयए) च्या खाजगीकरणासाठी आरिफ हबीब कन्सोर्टियमने ११५ अब्ज डॉलर्स (१०.२९ लाख कोटी रुपये) ची बोली सादर केली आहे. ही सर्वाधिक बोली आहे. लकी सिमेंटनेही १०१.५० अब्ज डॉलर्सची बोली सादर केली आहे आणि एअरब्लूने २६.५ अब्ज डॉलर्सची बोली सादर केली आहे. आरिफ हबीब ग्रुप हा चार कंपन्यांचा समूह आहे. ते खतांपासून ते शिक्षणापर्यंत सर्व क्षेत्रांमध्ये कार्यरत आहेत. आरिफ हबीब ग्रुप हा पाकिस्तानच्या सर्वात अनुभवी कॉर्पोरेट हाऊसपैकी एक मानला जातो.

पाकिस्तान इंटरनॅशनल एअरलाइन्स (पीआयए) च्या ७५% शेअर्सचा लिलाव केला जात आहे. लिलावातून मिळणाऱ्या एकूण रकमेपैकी ९२.५% रक्कम एअरलाइनच्या सुधारणा आणि पुनर्रचनासाठी खर्च केली जाईल. पीआयएकडे ३२ विमाने आहेत, ज्यात एअरबस ए३२०, बोईंग ७३७, एअरबस ए३३० आणि बोईंग ७७७ सारख्या मॉडेल्सचा समावेश आहे.

दरम्यान, पाकिस्तान सरकारवर आंतरराष्ट्रीय नाणेनिधी (IMF) चा दबाव आहे. पाकिस्तानला IMF कडून अंदाजे $7 अब्जच्या बेलआउट पॅकेजची आवश्यकता आहे आणि त्या बदल्यात, IMF तोट्यात असलेल्या सरकारी कंपन्यांना खाजगी हाती सोपवू इच्छित आहे.