वाॅशिंग्टन - अमेरिकेचे राष्ट्राध्यक्ष डोनाल्ड ट्रम्प व टेस्ला, स्पेसएक्सचे सर्वेसर्वा इलॉन मस्क यांच्यातील मैत्रीपूर्ण नात्यात तणाव निर्माण झाला आहे. या तणावाचा परिणाम अमेरिकेच्या भविष्यावर होण्याची भीती असल्याने ट्रम्प व मस्क यांच्यात समेट घडवून आणण्यासाठी सत्ताधारी पक्ष रिपब्लिकनने पुढाकार घेतला आहे. दोघांनीही आपापसांतील मतभेद कमी करण्याची विनंती पक्षाने ट्रम्प व मस्क यांना केली आहे.
ट्रम्प व मस्क हे दोघेही अमेरिकेतील शक्तिशाली पुरुष आहेत. त्यांच्यातील वैरामुळे टॅरिफ व सीमा खर्च कायद्यावर विपरीत परिणाम होण्याची भीती निर्माण झाली आहे. या कायद्यासाठी ट्रम्प यांनी पुढाकार घेतला होता. मात्र, मस्क यांनी ट्रम्पच्या कायद्याविरोधात उघड भूमिका घेतली आहे. जे काम आम्ही सुरू केले आहे, त्यावर ट्रम्प व मस्क यांच्यातील वादाचा परिणाम होणार नसल्याचे वॉशिंग्टन राज्याचे रिपब्लिकन पक्षाचे प्रतिनिधी डॅन न्यूहाउस यांनी स्पष्ट केले. या दोघांमधील वाददेखील लवकर संपतील असे ते म्हणाले. वादाच्या पार्श्वभूमीवर, ट्रम्प यांनी म्हटले आहे की ते मस्कबद्दल विचारही करत नाहीत. ते काही काळ मस्कशी बोलणारही नाहीत.
दोघे नक्की एकत्र येतीलट्रम्प व मस्क या दोघांनी एकत्र काम केले तर अमेरिकेसाठी खूप काही करता येईल. त्यामुळे ते नक्की एकत्र येतील असा विश्वास टेक्सासचे रिपब्लिकन सिनेटर टेड क्रूज यांनी व्यक्त केला.
एकमेकांना लक्ष्य करत टीका केल्याने झाला वाद शुक्रवारी दुपारपर्यंत मस्क यांनी राष्ट्राध्यक्ष ट्रम्प यांच्याविरोधात कोणतेही वक्तव्य केले नव्हते. ते सोशल मीडियावर आपल्या वेगवेगळ्या कंपन्यांसंदर्भात पोस्ट करत होते. दुसरीकडे ट्रम्प व्हाइट हाउसमधून बाहेर पडत न्यू जर्सीतील बेडमिन्स्टर येथील त्यांच्या गोल्फ क्लबकडे निघाले. दोघांमधील वादासंदर्भात पत्रकारांनी विचारलेल्या प्रश्नाचे उत्तर देणे डोनाल्ड ट्रम्प यांनी टाळले.
स्थलांतर कायद्याचे उल्लंघन करणाऱ्या ४४ लोकांना अटकलॉस एंजेलिस : अमेरिकेच्या लॉस एंजेलिस शहरात इमिग्रेशन अधिकाऱ्यांनी स्थलांतर कायद्याचे उल्लंघन केल्याप्रकरणी ४४ लोकांना अटक केली आहे. अटकेच्या कारवाईला विरोध झाल्याने अधिकारी व लोकांमध्ये संघर्ष उडाला. या लोकांना पांगवण्यासाठी पोलिसांनी लाठीचार्ज करत अश्रुधुराच्या नळकांड्या फोडल्याचे अधिकाऱ्याने सांगितले. इमिग्रेशन व सीमाशुल्क अंमलबजावणी अधिकाऱ्यांनी एजेंटच्या मदतीने शहरातील तीन ठिकाणी तपास अभियान राबवले. या दरम्यान किमान ४४ लोकांना अटक केल्याची माहिती गृह मंत्रालयाचे प्रवक्ते यास्मीन पिट्स यांनी दिली. इमिग्रेशन अधिकाऱ्यांनी स्थलांतर कायद्याचे उल्लंघन करणाऱ्या लोकांना दोन किराणा स्टोर, फॅशन डिस्ट्रिकचे एक गोदाम व एका डोनटच्या गोदामासह सात ठिकाणांहून अटक केल्याची माहिती कोलिशन ऑफ ह्यूमन इमिग्रंट राइट्सचे कार्यकारी संचालकांनी दिली.