नवी दिल्ली- पनामा पेपर्सप्रकरणात नवाझ शरीफ यांच्या अडचणींमध्ये वाढ झाली आहे. शरीफ यांचे जावई कॅप्टन मोहम्मद सफदर यांना सोमवारी पहाटे नॅशनल अकाउंटेबिलिटी ब्युरोच्या (नॅब) पथकाने अटक केली. पाकिस्तानमधील आंतरराष्ट्रीय विमानतळावरुन त्यांना अटक करण्यात आली आहे. पनामा पेपर्सप्रकरणात नवाझ शरीफ आणि त्यांच्या कुटुंबियांविरोधात खटले दाखल करण्याचे आदेश पाकमधील सुप्रीम कोर्टाने जुलैमध्ये दिले होते. यानंतर नवाझ शरीफ यांना पंतप्रधानपदावरुन पायउतार व्हावं लागलं होतं. सोमवारी पहाटे शरीफ यांची मुलगी मरियम आणि जावई सफदर हे दोघे कतार एअरलाईन्सच्या विमानाने बेनझिर आंतरराष्ट्रीय विमानतळावर उतरले होते. मरियम यांच्या स्वागतासाठी पाकिस्तान मुस्लीम लीग – नवाझ या पक्षाचे कार्यकर्ते मोठ्या संख्येने उपस्थित होते. शरीफ कुटुंबियांच्या समर्थनार्थ घोषणाबाजीही सुरु होती. याच दरम्यान नॅबच्या सहा अधिकाऱ्यांचं पथक विमानतळावर पोहोचलं आणि त्यांनी सफदर यांना अटक केली. तर मरियम यांना अद्याप अटक करण्यात आलेली नाही.
कॅप्टन मोहम्मद सफदर यांना पनामा पेपरप्रकरणात कोर्टाने समन्स बजावलं होतं. पण त्यानंतरही कोर्टात हजर न झाल्याने त्यांच्याविरोधात अजामीनपात्र वॉरंट काढण्यात आलं होतं. सफदर यांच्या अटकेनंतर सोमवारी सकाळी मरियम कोर्टात अटकपूर्व जामिनासाठी अर्ज करणार असल्याची माहिती मिळते आहे. तर सफदर यांच्याकडूनही कोर्टात जामिनासाठी याचिका दाखल होईल, असं स्थानिक वृत्तपत्रांनी म्हटलं आहे.
पनामा पेपर्समध्ये नवाज शरीफ यांनी लंडनच्या उच्चभ्रू वस्तीत मालमत्ता खरेदी केल्याचं समोर आलं होतं. शरीफ यांच्या मुलांच्या परदेशात कंपन्या असून शरीफ कुटुंबाची चार महागडी घर असल्याची माहिती उघड झाली होती. याप्रकरणात सुप्रीम कोर्टात याचिका दाखल झाली होती. जुलैमध्ये सुप्रीम कोर्टाने याप्रकरणात निकाल दिला होता. शरीफ यांचे पुत्र हुसेन आणि हसन, कन्या मरियम, जावई मोहम्मद सफदर, शरीफ यांचे विश्वासू साथीदार इसाक दार यांना सुप्रीम कोर्टाने दोषी ठरवलं होतं.
काय आहे पनामा पेपर्सप्रकरण ?पनामा या देशातील ‘मोझॅक फॉन्सेका’ या कायदा सल्लागार कंपनीची ११. ५ दशलक्ष गोपनीय कागदपत्रं उघड झाली होती. यात जगभरातील राजकारणी, उद्योगपती, व्यावसायिक, सिनेस्टार, क्रिकेटर्स यांनी मालमत्ता लपवण्यासाठी आणि कर चुकवण्यासाठी पनामा, ब्रिटिश व्हर्जिन आयलंड्स, जर्सी, बहामा आणि सेशल्स बेट या देशांमध्ये बोगस कंपन्यांमार्फत पैसा गुंतवला होता.